BAHA, LANDSLIDE

Miigo sa Sugbo tungod sa way pagtuang nga uwan

TUNGOD sa way tuang-tuang nga uwan sukad niadtong Dominggo sa kaadlawon hangtod kagahapon sa hapon, daghang mga dapit sa Sugbo ang gibahaan ug nangaigo sa landslide.

Tungod niini, mga siyudad sa Sugbo ug Mandaue, ingon man ang Provincial Government nideklarar og way klase kagahapon.

Nipahibawo usab ang Kapitolyo nga wa usay klase karong adlawa sa tanang level hangtod sa high school.

Gawas dinhi sa Sugbo, apektado usab sa baha ug landslides ang mga dapit sa Bohol, Ormoc, Leyte ug Cagayan de Oro.

Daghan sa mga bukirang barangay sa dakbayan sa Sugbo ang apektado sa uwan nga niresulta sa pagdahili sa yuta, pagka-anod sa mga balay sa baha.

Sa barangay Bacayan, usa ka light material nga balay ang gianod sa baha sa Butuanon River ug niapekto sa laing 167 ka balay.

Si Barangay Kapitan Zenaida Colina nagkanayon nga temporaryo niyang gipabakwit ang gatusan ka biktima sa ilang sports complex ug ang uban didto sa gym sa Villa Leyson.

Tulo ka mga balay nga ginama sa light materials sa sityo Ylaya, barangay Talamban diin nilagbas ang Butuanon river ang gianod sa samang baha.

Si Kapitan Dario Arcilla nagkanayon nga naanod ang mga senina, mga butang sa tulo ka pamilya nga nagpuyo ingon man ang ilang mga tinda nga ilimnon.

Ang lugar adunay dulan 40 ka mga balay nga ginama sa light materials ug gitug-an ni Arcilla nga iya nang gimanduan sa pagbalhin sa Talamban Elementary Schools ang kadtong mga pamilya kansang sitwasyon nahimutang sa peligro.

Sa barangay Pit-os, duha ka mga balay ang gianod sa baha, usa ang direyot maanod ug laing usa natumpag gumikan sa baha.

Si Kapitan Nilo Bontilao, nitug-an sa Superbalita Cebu nga gipabakwit niya ang mga apektadong residente sa ilang sports complex.

Ang Butuanon River nakaapekto usab sa mga barangay sa Mandaue City.

Kini naglangkob sa Cabancalan, Canduman, Casuntingan, Tingub, Maguikay, Tabok, Paknaan, Alang-alang ug Umapad.

Gipabakwit ni Mayor Luigi Quisumbing ang kinatibuk-ang 500 ka mga pamilya.

“Affected gyud nato sa baha karong adlawa (gahapon) ang siyam ka barangays nga nagkupot sa Butuanon,” matod ni Felix Suico, pangu sa City Disaster Risk Reduction and Management Office (CDRRMO).

Ang Provincial Disaster Risk Reduction and Management Office nakadawat og mga taho gikan sa lokal disaster risk reduction and management officer sa kalungsuran ug mga siyudad sa lalawigan bahin sa lapad nga baha ug gagmay nga pagdahili sa yuta sa ilang dapit.

Sa lungsod Dumanjug, siya ka balay ang gipangbakwit tungod sa hulga sa baha. Samtang, luwas nga nakaplagan ang mananagat nga si Denis Sayson, 36, unang gikataho nga nawagtang.

Sa Danao City, gibahaan ang mga barangay Guinsay, Cotcot ug ubang mga dapit nga duol sa sapa ug dagat.

Sa Carcar City, nakasinati og pagbaha ang mga molupyo sa Sitio Laray Barangay Poblacion 2 ug Poblacion 3.

Sa Talisay City, gibahaan usab ang mga barangay Tabunok, Dumlog ug Lagtang samtang nisaka ang level sa tubig sa Mananga River.

Sa City of Naga, nakasinati og baha ang mga barangay Patag ug Tinaan.

Samtang sa lungsod sa Consolacion upat ka mga barangay ang gibahaan nga mao ang Pitogo, Cansaga, Tayud ug Poblacion diin gipatuman ang pugsanon nga pagpabakwit sa mga pamilya.

Sa Toledo City, 130 ka mga household ang gipangbakwti sa Barangay Ibo tungod sa baha nga nasinati usab sa mga barangay Sapangdaku, Poblacion 1 ug Poblacion 2.

Gibahaan usab ang mga barangay sa lungsod sa Liloan nga naglakip sa Cotcot diin sa pagkutlo ning balita dili maagian ang taytayan sa dapit, nawagtangan og kuryente sa Yati samtang gibahaan usab ang Catarman, Tayud, Jubay ug San Vicente.

LANDSLIDE

Di usab maagian ang karsada sa Brgy. Sirao, dakbayan sa Sugbo tungod sa pagkaguba niini human mohumok ang yuta nga pundasyon niini.

Naigo usab sa landslide ang mga Brgy. Pamutan, Busay, Agsungot, Bacayan ug Pit-os.