Kalampusan sa Sinulog

MALINAWON ug malampuson ang pagpahigayon sa Sinulog 2017 grand parade niadtong Dominggo. Kini taliwala sa mga nikatap nga hugonhugon sa sayo pa, sa posibling pagpamomba nga maoy nakapaalarma sa atong mga tinugyanan sa balaod.

Gawas lang sa mga ginagmayng kasikas, walay mga dagkong panghitabo nga nasugatan ang atong mga kapulisan kinsa giabagan sa mga armadong kusog sa nasod ug sa mga kadagkuan sa dakbayan sa Sugbo aron mapatuman ang seguridad sa publiko.

Hayan ang pagpawong sa signal sa mga cell sites, bisan pa man og nakaapekto kini sa pipila ka mga dagkong negusyo, maoy usa sa mga gitumbok nga nakatampo sa kalinaw sa pinakadakong relihiyuso ug kulturang kalihukan sa Sugbo.

Di usab nato isalikway ang pagpamubo sa rota nga gitadlasan sa mga partisipante ug ang pagpatuman sa mga istriktong lagda atol sa kasaulogan ang nakagiya usab sa kalampusan.

Hinuon gihulagway nga nikunhod ang mga nisaksi sa kalihukan kon itandi kini sa niaging mga katuigan. Gituohan nga ang dili maayong dagan sa panahon sa unang pipila ka mga adlaw, ug ingon man ang mga negatibong pagpangapas nga mikatap maoy mga rason niini.

Kon sa niaging tuig miabot ngadto sa 3.2 million ang nga nisalmot sa selebrasyon, niadtong Dominggo gibana-banang mi-ubos ngadto sa 1.5 milyones na lang.

Gawas nga nasakripisyo ang kinabag-an gumikan sa pagpawong sa mga cell sites, aduna usay mga kalihukan nga gikanselar ilabi na kadtong mga gidudahan nga makamugna og kagubot.

Sa kinatibuk-an, kitang tanan nga miitsa sa atong ayuda, nakatampo usab sa kalampusan. Pit Senyor!