Kalingawan o siguridad?
DAGHAN ang nasagmuyo ug nagbagulbol gumikan kay wala matagbaw sa ilang pagsaksi sa Sinulog grand parade niadtong Domingo. Una, ilang gireklamo ang pag-usab sa sistema sa pagpahigayon sa street dancing. Dili na carousel route o kanang magtuyok ang mga contingents sa rota unya mosayaw o mo- perform gyud sa dalan. Ang nahitabo niadtong Domingo, gipa-ubsan ang rota kay gihuman og sayo nga adlaw pa gumikan sa hulga sa pagpamomba sa mga terorista. Unya wala na kaayo mo- perform ang mga contingents sa dalan kay naglakaw na lang.
Maayo man tong carousel kay kon diin nanukad tong contingent adto usab motapos. Busa kadtong wala makasulod sa grandstand ug naa ra sa daplin sa kalsada makakita sa performance sa mga contingents. Didto ako magbase sa One Mango sa Gen. Maxilom st., sa among Sinulog coverage sa dySS Super Radyo, pipila ra sa mga contingents ang akong nasaksihan nga mi- perform sa among nahimutangan. Naglakaw na ang kadaghanan sa mga contingents.
Unya ang gustong magmaya niadtong Sinulog grand parade labi pa ang mga batan-on nga mahiligon sa street party wala tanto malingaw gumikan kay gidili man ang pagpahigayon og street parties aron kalikayan ang mga kagubot. Kasagaran sa mga kagubot inig human sa grand parade gumikan sa street parties kay mga hubog na ang kadaghanan. Ang notado nga gubot kanang Mango Square ug diha sa Juana Osmena st., kadtong Baseline restaurant kaniadto. Pero niadtong Domingo sa gabii, gibadlong mismo sa mayor ang mga establisamento sa maong lugar nga misupak sa iyang kamanduan nga dili magpahigayon og street party.
Mingaw o dili sadya ang Sinulog niadtong Domingo dili sama sa naandan. Pun-an pa gyud nga gipawong ang mga cellsites sa mga cellular phones, samot na. Pero sa mga nakasabot sa katuyuan sa mga awtoridad sa ilang lakang, maka-ingon baya usab nga maayo baya. Gumikan sa hulga sa pagpamomba maong giusab ang sistema. Unsa man diay palabihon ninyo, ang kalingaw o siguridad? Natural mas atong hatagan og priority o pagtagad ang siguridad kay mga kinabuhi sa mga tawo ang nakataya. Kon simbako, ang maong hulga sa pagpamomba, tinud-on aning mga tawo nga buringog og utok, unsa may mahitabo?
Sumala unsay nahitabo sa Davao City sa dihang gibombahan ang ilang night market? Unsay nahitabo sa Hilongos, Leyte atol sa ilang tinuig nga kapistahan?
Bisan makakomentaryo kita sa pag-usab sa sistema ug sa rekomendasyon sa mga awtoridad sa pagpawong sa signal sa cellular phones, apan magpasalamat kita sa Labaw’ng Makagagahum ug ni Senyor Santo Nino nga nahimong nagmalampusom, malinawon ug mabulukon ang pagpahigayon sa Sinulog grand parade.