Mga badlungon inig Sinulog

BISAN pa man sa kadaghan sa kapulisan nga magbantay sa kalinaw ug seguridad atol sa Fiesta Senyor, duna sab gyuy mga badlungon nga daw di mahadlok dakpon.

Apil niini kadtong mga nagsinggit-singgit og “stampede” sa gawas sa usa ka Sinulog dance party didto sa Kasambagan sa miaging Sabado. Nganong mangita man og gubot ug mangitag paagi nga posibleng mangaangol o simbako dunay mamatay kon di na makasulod ug makasalmot sa ki-at?

Apil niini ang mga establisemento nga mogara hinuon sa pagpahigayon og mga street party labi na niining anaa sa dalan Juana Osmena bisan pa og gidili kini inig human sa Sinulog Grand Parade.

Ato na lang sab iapil kining usa ka telco nga wa tinuda pagpawong ang ilang cell signals bisan pa man sa panawagan sa mga tinugyanan nga ipahigayon ang mobile shutdown.

Mao nga makaingon gyud ko og mayra kon kini sila masilotan.

Maayo na lang kay mayoriya sa kapin sa milyon nga nanggawas gikan sa ilang kabalayan ug naa sa kadalanan disiplinado ra man. Ug diha kanila makita nato nga dakong kalamposan ang pagsiguro sa kalinaw ug kahapsay atol sa Fiesta Senyor.

ULAN

Dakong kabalaka sa miaging Biyernes nga magbunok ang ulan labi na sa Dominggo. Apan kalit nga nisidlak ang adlaw pag Dominggo ug nagpabilin kini hangtod pagka gabii.

Kagahapon, sayo na sab nibundak ang ulan.

Daghan ang moingon nga natayming lang kini. Apan dunay mga deboto ni Senyor Santo Nino ang minsister nga tungod gyud kini sa Balaang Bata.

Alang kanako, magpasalamat kita kang Senyor Santo Nino nga malampuson ang mga kalihokan sa Fiesta labi na ang fluvial parade ug ang prosesyon sa Sabado ug ang Sinulog sa Dominggo.

DANCE CREW

Daghang salamat nga unang higayon alang kanako, kang Doris ug mga anak nga maimbitar ug makatungtong sa VIP section sa grandstand sa Cebu City Sports Center.

Ug nalingaw gyud ang mga bata sa contest sa mga dance crew nga gipahigayon atol sa lunch break sa Sinulog parade. Basi sa reaksyon sa mga bata, nakita nako nga epektibo kini sa pagdani sa atensyon sa mga bata ug mga tin-edyer ug marelate nila sa Fiesta Senyor.

Uyon ko nga ipadayon kini.