Sa sapatos siya milampos
WALA gyuy imposible sa tawo nga kahibawo magkugi.
Usa sa tawo nga makapamatuod ini mao si Marvin Villavenda, 40-anyos, usa ka shoe
repairman kun tig-ayo og sapatos ug presidente sa Pundok Kadasig sa Barangay Kamagayan, Siyudad sa Sugbo.
Nagsugod ang ilang shoe repair business atong 1984 nga gisugdan sa iyang ginikanan, kinsa ang amahan niya usa ka
repairman dili lamang sa mga sapatos, lakip na ini ang pagayo sa mga bag ug payong.
Sa Grade 1 pa si Villavenda, nagsugod na ang iyang amahan sa pagpang-ayo sa mga sapatos, payong, ug bag.
Ikaduha ug nag-inusara nga lalake sa upat ka magsuon, nakahuman si Villavenda sa kursong Nautical sa University of Cebu - METC kaniadtong Oktobre 1996 tinabangan sa kugi sa iyang ginikanan.
Gibutyag ni Villavenda nga di siya ganahan sa kurso apan gihuman kini niya aron malipay ang iyang ginikanan.
Apan wa na siya makasakay og barko alang sa apprenticeship tungod kay nimabdos na ang iyang asawa sa ilang unang anak niadtong higayuna.
Gawas ana, wala siya nagmahay sa mga nahitabo sa iyang kinabuhi kay alang niya, wa malinya niya ang pagbarko kay naa sa pagnegosyo.
Inay mosakay sa barko, sa pagpangayo sa sapatos siya nidiretso.
“Di baya lalim nga magdukdok sa sapatos unya usahay mangutang pa si Mama ug si Papa sa 5-6. Unya di bitaw nato humnon ang atong kurso. Ako jud gihuman ug nahuman gyud kaluoy sa Ginuo,” matod ni Villavenda.
Tuig 1998 ug 23-anyos siya sa dihang nagsugod ang magtiayong Villavenda sa ilang kaugalingong repair shop.
Dunay mga higayon nga minos ang magpaayo, busa minos ang kita apan naa puy mga higayon nga mukusog ang kita. Naa pay higayon nga kasab-an siya kaniadto sa kustomer kon madelay o malangan ang pagayo sa sapatos.
NANGUTANG
Kaniadto, nanghuwam si Villavenda sa Turko og P10,000 aron adunay ikapuhunan sa iyang gitukod nga repair shop ug pagpalit sa mga materyales sama sa lapa-lapa sa sapatos.
Miyembro sab siya sa usa ka kooperatiba diin nakatabang sab sa pagpalambo sa iyang repair shop.
Doble ang pagpaningkamot ni Villavenda aron mabayaran ang huwam nga kwarta. Matod niya, “Maningkamot gyud aron mabayaran. Bisag Dominggo trabaho gihapon.”
Gawas ana, nakaagi sab sila og pagsuway sa ilang negosyo.
Niadtong Nobyembre 2014, adunay nahitabo nga sunog sa Junquera ug naapil ang ilang pwesto kaniadto.
Lisod kini alang nila apan wala siya nagpakawala sa paglaom. Nagtukod sila pag-usab sa ilang bag-ong repair shop.
“Balik mi ato sa uno. Imbis kusog-kusog na unta to,” matod ni Villavenda.
Si Villavenda, kinsa ikaduha sa upat ka managsuon, kasamtangang nagpaeskwela sa iyang tulo ka mga anak inubanan sa pagkugi sa iyang asawa nga si Melissa, 41.
Pinaagi sa pagpaningkamot ug pag-ampo ni Villavenda, napaeskwela niya ang iyang tulo ka mga anak.
Ang iyang kamagwangang anak nagkuha sa kursong Bachelor of Science in Physical Therapy sa Cebu Doctors’ University nga naa na karon sa 3rd
year college. Ang ikaduha nagkuha sa kursong Nautical sa University of Cebu (UC) nga naa na karon sa 2nd year college, samtang ang kinamanghuran niyang anak naa sa Grade 8 sa Cebu City National Science High School.
Nakadasig kaniya mao ang iyang gugma sa iyang sa iyang asawa ug anak.
Gawas sa pag-ayo ug sapatos, aduna sab siyay sari-sari store, usa ka jeep nga pasahiroan, printing o ang pag-imprenta og tshirts.
Namuhi sab sila og baboy nga nakatabang sab sa ilang pang-adlaw-adlaw nga panginahanglan.
Nakapalit siya og yuta ug nakatukod na sab kini ug balay nga naa mahimutang sa Liloan.
PUNDOK KADASIG
Ang Pundok Kadasig usa ka panagtapok sa mga sapatero sa Barangay Kamagayan nga gilusad atong April 24, 2016.
“Sama ani ron among Pundok Kadasig, nga magkahiusa ang mga sapatero, nga makapundok mi, nga makahatag mi og kaayohan diri sa Kamagayan, para sa repair. Unya printing, nga makahibaw sab sila ba nga naa diay mangayo diha. Naa diay printing diha, nga ang presyo barato ra, di kaayo mahal,” matod ni Villavenda.
Isip presidente sa Pundok Kadasig, gitan-aw ni Villavenda ang kaayohan sa tanan, dili lang sa iyang pamilya apan lakip na ini ang kaayohan sa iyang kaubanan sa Pundok Kadasig.
Matod niya nga aduna nay grupo ang mga sapatero sa una apan wa nagkahiusa. Mao nga mapasalamaton siya karon kay daghang nitabang alang sa katukoran sa ilang grupo.
“Usahay, naa say magkadeperensiyahay ang grupo pero madugay mahilot raman nato,” matod niya.
WA DAMHA
Wala magdahom si Villavenda sa nahitabo sa iyang kinabuhi ug sa iyang pamilya karon. Tinabangan sa iyang pagkugi ug pag-ampo, napaskwela niya ang iyang mga anak. “Murag makaingon sab ko ba, ang Ginoo siguro nagbuot sab kay Iyaha man tanan. Ang ako lang sab kugi lang, trabaho, ampo mao ra may importante gyud,” matod niya.
“Mura bitawg makaana ta ba nga ang damgo natuman gyud,” dugang ni Villavenda.