Mga agulo sa kalibunan
“UNNNGGGHHH!” “AAAHHH!” Nabati gayud ni Mark ang mga agulo sa iyang asawa ug ang hangos sa kaubang lalake niini nga misuot sa kalibunan kaganina ning nagkahanaw nga silaw sa adlaw. Gibati niya ang tumang pangabubho ug nakatuaw siya, “Napakasakit, Kuya Eddie!”
Nasundan niya ang duruha gikang nanggawas sa usa ka balay nga sa tan-aw niya dihay dakong kumbira ug nahimutang halayo og diyutay ning dapit nga iyang nahimutangan. Atol kadto nga nagparking siya sa daplin sa karsada kay ang iyang sekanhan nga sakyanan, model 1950, naaberiya.
Mao kini karon ang resulta sa tumang kumpyansa niya sa iyang asawa nga probinsiyana nga simple ra ang kagwapa. Di tig mek-ap. Simple ra ang sinina – way pakigol ug paseksi. Simple ra ang batasan ug kinaiya. Maayong mosilbi kaniya isip asawa. Maayong moandam sa iyang isul-ob nga mga sinina. Maayong moandam sa ilang kalan-on sa pamahaw, paniadto ug panihapon. Maayong motambag bahin sa iyang trabaho nga ahenteg mga aplayans. Maayong mokumedya ug mopakatawa kaniya. Maayong momasahe kaniya. And the last but not the least, maayong mokumbati kaniya sa kama. Hala! Mao kini karon ang iyang gipanguyawan.
Wa nay katarungan nga di siya motuo sa iyang nakita. Nagluib kaniya ang iyang asawa. Sa pasumbingay pa, nagduwag laing team ang iyang asawa. Unyag team kuno kini ni Michael Jordan, bi? Di, maayo kaayo ning mo-dribol, mo-shoot ug mohansak!
Nanghalang ang mga mata ni Mark nga mihinol sa butanganag pistola sud sa iyang sakyanan, apan wa kini sa sudlanan. Basig nalimtan niya sa ilang opisina. Wa pod siyay nakuhang mahait nga hinagiban kay di siya tigdala niini. Bisan pisi, wa siyay nakit-an, aron hiktan ang liog sa mga maluibon. Usa ka rolyo sa ‘ tissue paper’ ray iyang nadala nga miam-am ug mipahid sa luhang midagayday sa iyang aping. Misantop sa iyang hunahuna nga iya lang bali-balian sa mga bukog ang mga maluibon, ginamit ang nahibaw-an niya sa ‘martial arts.’
“Pesting yawa! Gawas mo diha!” singgaak ni Mark nga misum-ok sa kalibunan bitbit ang iyang ‘ video cam recorder,’ nga hayag kaayog ‘flash,’ para ebidensiya sa korte.
Apan lahi ang iyang nasaksihan. Gidunghayan og singot ang mga nawong sa iyang asawa ug sa kuyog niining lalake. Ang duruha nanagpungko ug nanaghapoy sa ilang mga tiyan.
“M-Mark?! Sakit kaayo among tiyan! Nagkalibanga mi…!” matod sa asawa ni Mark.
“H-Ha?” nahingangha si Mark. “Hala, niay ‘tissue’ o! Pangilo. Dad-on ta mo sa San Isidro Kintanar Memorial Hospital! Naaberiya ra bang atong sakyanan da! Nagkalibang pog asayte. Hastang kayasa, uy! Nagpangawot siya sa iyang ulo.