Wa ka move on

Dear Noy Kulas,

Ako si Lyzet, 26 anyos na ug nagtrabaho. Ambot kon dako ba ni nga problema sa uban, but para nako big deal kay tulo na ka tuig nako ning gidala.

Duna koy uyab kaniadto. Suod mi ug sa iyang pamilya. Maingon tang punga nga pinangga ko niya ug sa iyang pamilya. Maora na ko og miyembro sa ilang pamilya kon tinagdan ang akong hisgutan. Nagtuo kong kami na hangtod nga niabot ang higayon nga sakit kaayo, iya kong gibuwagan.

Natural na shock ko kay way third party nga involved. Loyal mi sa among relasyon. Wa siya nihatag og rason kon ngano, apan niingon ang among common friends nga di siya ganahan nga magsige ko og check niya, kon asa na siya, unsay gibuhat ug uban pa diha. Dautan diay na? Until now, sakit gihapon ang hitabo. Bisan giunsa nako, wa pa ko ka move on niya. Ngano kaha? LYZET

Lyzet,

Nagduda ko nga hangtod karon, nagpadayon ang inyong komunikasyon, labina sa iyang pamilya ug inyong common friends. Mao ni baya ang common usab nga mistake sa mga tawo nga wa maka move on. Maorag nagtuok sa iyang kaugalingong liog.

Ang angay gyud unta nianang buhaton mao ang pagputol sa komunikasyon tali sa iyang pamilya ug niya. Mao nay usa sa mga labing epektibo alang sa mas dali ug hustong paagi sa pag move on. Maorag cruel paminawon apan epektibo. Laing paagi mao ang pag unfriend ug paghunong sa pag stalk. Bati gihapon paminawon, di ba? But epektibo gihapon kini kaayo.

Naa koy higala nga ingon ani ang iyang gibuhat sa iyang kanhi kapuyo for 10 years. Giapil pa ko niya sa paglikay. But nakasabot ko kay ako na siyang gisultihan ani. Karon, she is happily married ug maayo ang kinabuhi. Huna-hunaa pag-ayo kon imo bang makaya.