Nangita og engkuwentro
BISA’G miubos ang gidaghanon sa misaksi ug taliwa sa mga hulga sa pagpamomba nahimong malampuson ang pagpahigayon sa Sinulog sa Sugbo sa simbahang Katolitiko.
Di lang ko moingon nga naangkon ang kalinaw kay gipawon’g ang signal sa cellphone. Kay sukad pa kaniadto, bisag dunay signal wa may pagpamomba nga nahitabo.
Nabalaka man gud ang kadaghanan nga tingalig maanad ang kapulisan kay bulilyaso ang PNP Intel Network batok sa mga dautang elemento hilabi na sa mga terorista.
Samtang pagka daghan ug badlungon sa miaging Sinulog. Bisan pa sa pahimangno sa Cebu City government nagbaha sa gihapon ang pag hubog hubog mabatanon man o matiguwang.
Gani ang usa sa tulo ka babaye duol sa akong tupad samtang nagkaon sa pungkopungko ang niingon maka “one night stand jud ta ani,” dayon mibarog ug nanglakaw.
Kini nahitabo mga alas otso ang takna sa gabii nga duol sa among gipuyan sa usa ka busy nga lugar dili halayo sa may Fuente Osmeña, nga maoy sentro nga agianan sa Sinulog ug di sab halayo sa Cebu City Sports Center ang final destination sa parada sa Sinulog.
Ang gilitok sa batanong babaye nga one night stand nakapahinumdom kanako sa gisulti sa yanong trabahante diri kanako sa ilang nakitang panty sa miaging Sinulog sa kilid sa ilang gitrabahoan.
Para nako, way malisya ang akong nadunggan sa gisulti sa usa ka batanong baabye. Apan akong gisubay ug gitandi ang nadunggan mga estorya sa mga panghitabo atol sa Sinulog.
Kon wa ko masayop ang one night stand kadyot nga palami o pakighilawas sa bago lang gikaila nga nagkasabot sa usa lang ka higayon.
Sa ato pa, kon daghang naka grasya sa miaging Sinulog, anaa sab diay ang nadisgrasya tungod sa one night stand.
Nakapahinuhumdom hinuon kini kanako sa usa ka panghitabo sa among kauban sa media nga ato lang tawgon sa iyang pangan nga “JM.”
Nakailaila og batanong guwapa ug dihadiha nagkauyab ug nagkasabot nga magtigi ug magduwelo sa kalipay sa usa ka pribadong lugar.
Nahimong alegre ang estorya. Kay human sa kalipay gipanilngan man og bayad si “JM.”
JM: Di ba uyab naman ta Day.
Batanong guwapa: negusyo ning ako, sir.
Palihug tubaga kuno kon unsay mga pagtulunan niini?
ANDANAR GISAWAY
Kon dunay kauwaw si Presidential Communication Secretary Martin Andanar, panahon na ang pag resign niini sa katungdanan, human gisaway sa National Union of Journalist of the Philippines (NUJP).
Si Andanar nga kanhi sakop sa media wanay credibility sa iyang katungdanan. Ka klaro sa gipanuliti ni Duterte, pinaagi sa pagingon nga: “I have to declare martial law if have to, to, preserve my country... and the Filipino people. Ug way makapugong kanako ug wa nay invasion, invasion.”
Iresponsabli, matod pa ni Andanar, ang media sa sayop nga gibalita kabahin sa martial law. Matod pa niya, ang buot pasabot ni Duterte modeklara lang ug martial kon dunay hulga sa invasion ug rebellion.
Mahimong atong sabton ang trabaho ni Andanar sa paglaban ni Duterte. Apan klaro ra kaayo ang sayop ni Andanar sa pagkorehir sa tukmang balita sa media sa gitabi ni Duterte atubangan sa Davao City Chambers of Commerce and Industry.
TIGPATANTO IPADAKOP
Sa akong yanong pagsabot, dunay kasingkasing sa kaluoy si Presidente Digong Duterte, ngadto sa katawhang uyamot o kabus.
Tiaw moy iyang ipadakop ang mga nag negusyog 56. Kana bitawng makita ninyo nga mga Bombay kon Indian nga mag motor ug ang ilang suking vendors.
Kay klarong pagpanglupig ang gihimo sa mga tigpatanto Mabuktok naman sa pag bayad sa interes ang nangutang.
Taym pa. Mas maayo tingali ug ang gobiyerno mangitag paagi aron maoy mopautang sa mga kabus kay di kita makalaum sa mga bangko nga mopahuwan tungod sa kadaghan sa mga requirements.
Ang naka delikado sa hulga ni Duterte batok sa mga Bombay tingalig sakyan sa mga dautan. Kay didto sa Manila usa ka Bombay nga tigpatanto ang gipatay sa nagtaptap sa nawong.
Kining maong panghitabo ipasangil nasab unya ngadto ni Digong. Sama sa extra judicial killing may kalambigitan sa kampanya batok sa problema sa illegal nga drugas, ang gipasangil ngadto sa presidente.
Dunay apan. Kay ang gipamatay mga ultimong tawo nga nalambigit sa kalihukan sa illegal nga drugas.