2 pulis nga gitokhang gipatay

(Napatik sa Superbalita Davao, Enero 12, 2017)

NAPAILAWOM na sa Oplan Tuktok Hangyo (Oplan Tokhang) ug misurender na sa kapulisan sa Panabo City Police Office ang duha ka kanhi pulis nga napatay atol sa gilusad nga drug bust operation didto sa Purok 8, Barangay Ising, Carmen, Davao del Norte.

Mga napatay mao sila SPO2 Norberto Guardiana Amador, alyas Amahan, hamtong, residente sa Gamao Subdivision, Purok 6, San Francisco, Panabo City; ug PO2 Noe Terona Gementiza, hamtong, residente sa Block 28, Lot 34, Nicevelle Subdivision, Cagangohan, Panabo City.

Si SPO1 Eduard Avelino, imbestigador sa General Investigation Section sa Carmen Municipal Police Station, nagbutyag nga na-Tokhang na ang duha ka suspek nga kanhi pulis ug misurender na kini apan mibalik sa ilang pagpamaligya og drugas.

“Na-tokhang na sila sa Panabo police ug alleged misurrender na pero after sa pipila ka buwan, mibalik diay sa ilang pagpamaligya mao tong gi- test buy nato and positive ang result,” sulti ni Avelino nga nahinabi sa Superbalita.

Dugang pa nga pulos High-Value Target (HVT) ang duha human sila gipailawom sa surveillance sa Police Intelligence Branch sa Davao del Norte Provincial Police Office (DNPPO).

Nasayran nga dihang gitunol na sa nagtakuban nga pulis ang kuwarta bugti sa ilang gibaligya nga shabu, daling mibunlot og pusil ang duha ug namusil sa tropa sa kapulisan apan naunhan sila maong dungan nga namatay.

Nakuha sa ilang posisyon ang upat ka pakite sa gituohang shabu, usa ka Caspin caliber .45 pistol, usa ka Colt M1911A1 caliber .45 pistol ug mga basiyo sa bala.

Nasayran nga nadestino sab sa Carmen Municipal Police Station si PO2 Gementiza una kini na-assign sa Sta. Ana Police Station sa Davao City Police Office (DCPO) apan misayo siya og retiro niadtong Agosto 2016, subay sa gibutyag ni DCPO spokesperson P/ SInsp. Catherine dela Rey.

Gibutyag sab ni Avelino nga nag-Absent Without Official Leave (AWOL) ang napatay nga si Amador human kini gibutang sa Personnel Holding and Accounting Unit (RPHAU) of Regional Police Office (PRO) 11.

Mga patay nga lawas sa mga suspek gidala dayon sa Rivera Funeral Homes, Brgy. Sto Niño, Carmen, Davao del Norte.