Mga bakwit sa Sirao naglisod?

GATUSAN ka mga bakwit sa Barangay Sirao, dakbayan sa Sugbo gumikan sa pagdahili sa yuta sa Mt. Kan Irag naglisod na sa ilang inadlaw-adlaw nga pagkaon.

Si Kapitan Felix Limotan nibutyag nga nigasto na siya sa iyang kaugalingon nga kwarta aron makapalit og bugas, noodles ug delata para sa iyang mga residente kinsa temporaryong gipahiluna sa Sirao Elementary School, Pung-ol Sibugay gym ug Pung-ol Elementary School.

Moabot na sa 101 ka mga pamilya ang temporaryong namakwit ngadto sa mga lugar nga gihimong evacuation center.

Ang Department of Social Welfare and Services (DSWS) nakahatag na og tag tulo ka kilong bugas, de lata ug noodles ngadto sa apektadong mga pamilya sa miaging adlaw.

Matod ni Japson nga naglisod sila pag-abot sa lugar, labina sa Sirao Elementary School sanglit guba ang karsada ug naguba pa ang ilang van nga gikargahan sa relief goods kay napakang sa gahi nga bahin sa karsada ang radiator.

Matod ni Japson nga iyang ipasusi karong adlawa sa social worker.

Posible nga mohatag sila og dugang relief goods sama sa ilang unang nahatag sa mga biktima.

Si Limotan nagkanayon nga naproblema ang iyang mga residente ug nanginahanglan sila og folding bed aron di mohigda sa semento ang mga bakwit.

Nipadala na usab og sinakong bugas si Bise Mayor Edgardo Labella aron ihatag sa mga residente.