Baha, landslide, sunog tutokan sa Cebu City

HATAGAN og prayoridad sa Cebu City Government ang tulo ka dagkong mga problema nga kanunay na nasinati sa siyudad matag tuig gamit ang pundo sa Local Disaster Risk Reduction and Management Office (LDRRMO)

Si Nagiel Bañacia, public information officer ug pangulo sa LDRRMO, nagkanayon nga tutokan sa iyang buhatan ang problema sa sunog, baha ug landslide.

Karong tuiga, ang LDRRMO adunay P146 milyones nga pundo para pagtubag sa mga problema sa dakbayan.

Ila usab pangitaan og solusyon aron di na magbalikbalik ang maong mga suliran.

Atol sa meeting kagahapon nga gidumala ni Konsehal Joey Daluz III, chairman sa committee on social services sa Konseho nga gitambungan usab sa mga barangay kapitan, giawhag niya si Bañacia sa pagduso sa ilang kongkreto nga plano.

Partikular sa gihimong sanglitanan sa pangulo sa LDRRMO mao ang kakuwang sa evacuation center sa siyudad panahon sa katalagman.

Sagad gamiton mao ang mga lawak saringan sa lainglaing eskwelahan depende kon asa mahitabo ang sunog.

Gusto sa PIO nga makabaton og husto ug adunay kagamitan nga evacuation center ug posible usab kini nilang gamiton sa pagpalit og yuta isip relocation site aron ang mga tawo nga nagpuyo sa danger zone mahatagan og desenting lugar.

Samtang tutokan sa LDRRMO ang pag-upgrade unya sa mga ambulansiya sa Emergency Medical Services sa Siyudad subay sa standard sa Department of Health.

Matod ni Bañacia nga ilang bahinon ang mga ambulansiya ug idestino sa Poblacion Pardo, Sawang, City Hall, City Health, Capitol Site, Lahug, Mabolo, Talamban.

Kadtong mga barangay nga adunay ambulansiya, matod ni Bañacia, nga magpabilin kini sa ilang kustodiya.

Matod niya paigo na ang 10 ka mga ambulansiya nga moserbisyo sa Siyudad.

Ang moresponde sa bukid kadtong mga ambulansiya nga nadestino sa barangay sa kabukiran.

Ipaubos usab nila sa pagbansaybansay ang mga personnel aron adunay igo nga abilidad sa panahon sa pagresponde.

Samtang gigahinan sa LDRRMO og tag P1,000 matag buwan ang 300 ka fire volunteer nga maoy moabag sa mga bombero panahon sa sunog gamit ang budget sa 2017.

Nangayo usab siya og pasaylo ngadto sa mga kapitan kansang personnel sa barangay EMS di maapil sa budget kay gamay ra ang ilang pundo karong tuiga para sa maong programa.