Cargo vessel gikan sa Sugbo nalunod

ORMOC CITY, Leyte - Usa ka cargo vessel gikan sa Sugbo ang nalunod tunga-tunga sa Bohol ug Leyte sa miaging gabii.

Ang MV Meridian Tres dunay 29 ka sakay diin 28 niini ang naluwas ug sa paghimo ning balita, usa ang missing.

Base sa Maritime Incident Report sa Philippine Coast Guard (PCG), nakasugat og kusog nga hangin ug dagkong bawod ang maong cargo vessel nga padung unta sa Tacloban City.

Hinungdan nga mi-collapsed ang stock pile sa 160 ka unit nga 20-footer ug lima ka unit nga 10 footer container vans nga dunay sud nga nagkadaiyang butang.

Base sa timeline, alas 7:53 sa gabie, ang PCG Hilongos Leyte sub-station nakadawat og report gikan sa MV Lorcon Iloilo nga nakasugat og kakulian sa dagat ang maong cargo vessel.

Mi-report gilayon ang Hilongos Sub-station sa PCG Maasin Station bahin sa insidente.

Mimando ang PCG Maasin sa Hilongos ug Bato sub-station sa pagsusi sa nadawat nga report.

Sa pasiunang report ni PCG-Eastern Visayas commander Gregorio Adel Jr., duol sa Dawahon Island sa Bato Leyte ang nahitabo ang insidente.

Apan sa sige nilang monitor, nasayran nga mas duol kini sa Sto. Niño Dive sa Bohol.

Alas 8:15, nanawag si Adel sa Coast Guard Action Center pinaagi ni Lt. Rafael General Jr. alang sa search and rescue vessel nga ipadala sa area of jurisdiction sa Maasin.

Alas 9:00, nakadawat og report ang Maasin Station nga mimando na pag abandona sa cargo vessel ang kapitan nga si Napoleon Emphasis.

Mi-radyo gilayon sa mga barko ang Maasin Station ug nakadawat niini ang MV Ocean Kingdom, LCT PMI-8 ug MV Butuan nga duol sa area ug maoy mipahigayon sa search and rescue operation.

Alas 9:45, nadawat ang report nga naluwas ang kapitan ug 27 ka tripulante nga sila si Eduardo Espanueva; Leandro Andrade; Noel Sontosidad; Manuel Bacayana; Antolin Alampayan; Virgilio Franco; Rolando Caiangi; Primo Darilag; Benjarde Naval; Jezon Abique; Mark Andrew Moton; Ronald Aribuabo Jr; Julius Blanco; Joel Centino; Jan Rogel Tabiliran; Exequiel Dave Galvan; Reymart James Modina; Patrick Joshua Refugia; Felix Uy; Renante Oliverio; John Meynard Suarez; Kristian Noe Armentan; Jan Joel Salvador; Herald Venturillo; Emilio Almamento; Zaldy Pagaralan ug Jose Sablante Jr.

Samtang padayong gipangita ang usa ka tripulante nga si Benjamen Orola. Ala 1:00 sa kadlawon, Enero 18, naabot sa area ang barko sa PCG gikan sa Sugbo ug mi asistar sa search and rescue operation.

Si Adel nagakanayon nga posibleng gidala na sa Sugbo ang mga naluwas.

Gibantayan na usab karon sa PCG ang posibilidad nga dunay mahitabong oil spill sa nalunoran.

Gipaabot pa usab ang marine protest sa kapitan sa cargo vessel.

Ang cargo vessel gipanag-iya sa Meriadian Cargoes Forwarder Incorporation nga nakabase sa Tondo Manila.

(HULAGWAY NI CHESTER COCALIONG) NALUWAS. Makita ning hulagwaya ang tulo ka mga crew sa nalunod nga M/V Meridian Tres nga nagkupo human maluwas sa mga sakop sa M/V Filipina Butuan sa Cokaliong Shipping Lines sa niaging gabii. Ang Meridian Tres gikan sa Cebu paingon sa Nasipit atol sa...