Paz midepensa sa kapulisan
Pagpawong sa mga cell sites epektibo alang sa seguridad sa publiko
EPEKTIBO alang ni Lapu-Lapu City Mayor Paz Radaza ang pagpawong sa cellular phone signal atol sa Miss Universe swimwear presentation taliwala sa saway sa publiko.
Kapulisan naproblema sa kalit nga kausab sa plano sa Miss Universe Organizer ug host hotel ilabi na nga covert police ug counter sniper nakapuwesto na sa mga strategic locations.
“Dili nato ma- blame ang pulis, for the reason that it’s an international event (and to secure the candidates),” matod ni Radaza atol sa press conference.
Giuwan og saway ang kapulisan sa Sugbo sa pagmando sa National Telecommunications Commission (NTC) sa pagpawong sa cell sites sa Lapu-Lapu gumikan sa pagpahigayon sa maong beauty pageant.
Nag-alburoto ang mga subscriber sanglit ang ubang dapit sa Sugbo ang apektado sab sa pagpawong sa signal dili lang sa hingtungdang dakbayan.
Gihulagway ni Radaza nga taliwala sa mga kausaban o ang pagkaguba sa orihinal nga plano gumikan sa nasinateng dautang panahon nagmalampuson ang siyudad ilabi na ang Jpark Island Resort and Waterpark sa pag-host sa Miss Universe.
Garbo sab sa dakbayan nga nahimong host city sa usa mga kalihokan sa maong prestihiyusong beauty pageant.
Matod ni PRO 7 Director Noli Taliño, husto ang ilang pagpapawong sa cell sites kay di angay kompyansahan ang kalihukan nga usa ka international.
Sa pikas bahin, gibutyag ni PSSupt. Romel Cabagnot, city police director nga nagkabuang sila sa pagpakatap sa mga pulis nga mobantay sa matag kandidata.
Kini gumikan sa mga kausaban nga gipatuman sa Miss Universe Organizer ilabi man ang pagbalhin sa venue gikan sa pool side sa Jpark ngadto na sa Triton Ballroom tungod sa uwan.
Sumala pa ni Cabagnot nga inay sa first ug second floor ra ang room accommodation sa mga candidates sa Jpark, adunay uban nga na-abot sa eighth floor ang lawak.
Ang kapulisan miila sa mga strategic location alang sa security detail ilabi na sa counter sniper sa nagkadaiyang dapit diin anaa ang presensiya sa mga kandidata. Gipatuman sab ang “no-fly zone” sa mga abyon lakip na ang drone diha tungod sa Jpark.
Samtang pipila ka mga Sugboanon nakakita sa pipila ka mga kandidata sa dihang midalikyat ang 12 sa 16 ka mga kandidata sa SM Seaside City sa South Road Properties dakbayan sa Sugbo niadtong Martes.
Ang 12 ka mga kandidata nagagikan sa nasod sa Argentina, Bahamas, India, Czech Republic, Georgia, Indonesia, Malaysia, Namibia, Romania, Singapore, Slovak Republic ug Venezuela diin nibisita kini sa Uniqlo Store. Naabot kini alas 5:15 sa hapon diin nag-ilis sila sa bag-ong nga Spring-Summer collection sa Uniqlo.
Nihatag usab si Uniqlo chief operations officer Katsumi Kubota sa iyang welcome remarks.
Human sa wala moabot og 10 minutos nga photo opportunity sa bloggers ug local nga tigbalita, gibisita usab sa mga kandidata ang Forever 21 ug Flawless sa susamang mall.