Sundawo nanglugos
(Napatik sa Superbalita Cagayan De Oro, Enero 11, 2017)
NAKALINGKAWAS sa pagpanglugos gikan sa sundalong suspek ang usa ka babaye human kini gidala sa usa ka motel sa Kauswagan ning siyudad sa Cagayan dr Oro.
Ang biktima nga si Jane (tinoud nga identipikasyon gitago) ang misaysay nga gikan siya sa usa ka bar kay gikan nagkita sa iyang mga ig-agaw.
Giangkon niini nga naginusara lamang siyang miuli niadtong tungora tungod kay naanad na siya nga mouli nga luwas kanunay.
Gibutyag sab niini nga lango siya sa ilimnong makahubog apan insakto pa iyang panghuna-huna.
Apan iyang gikakurat nga kalit lang adunay migunit sa iyang abaga ug paglingi mao ang duha ka mga lalaki nga iyang namatikdan nga lango sab sa ilimnong makahubog.
Nagpatuo ang mga lalaki nga motabang kaniya pagpara og taxi aron makasakay apan nakurat siya dihang miuban pagsakay ang mga suspek ug gidala siya sa motel.
Saysay niini nga gihuptan sab siya sa iyang duha ka mga kamot hinungdan di siya makalihok.
Gani gisultihan niini ang driver sa taxi apan posibleng wa kini nagbali-bali sa pagtuong kaila silang tulo.
Paghidangat sud sa motel gipapauli sa usa ka lalaki ang iyang kauban ug ang nahibilin ang naila sa ngalan nga Clinton, giingong sakop sa 4th Infantry Divion, Philippine Army.
Sa sulod sa motel kalit siyang gihinol ug gipahigda apan nagsige siya og pakiluoy nga di dayunon ang plano niini.
Giplano ni Jane ang lakang nga makalingkawas hinungdan iya kining gisipa ug nidali og sud sa pansayan apan kay daot ang pultahan niini ang iyang tiil maoy iyang gituko samtang naglingkod sa inidoro.
Sa gawas nga bahin nagsige og bahad kaniya si Clinton nga kun nakadala lamang kini og pistola iya kining patyon.
Dali sab nga gi- dial ni Jane ang numero sa iyang higala ug nagpakitabang.
Gibutyag sab niini nga iyang namatikdan ang sundawo nga nanawag sa room boy aron mobayad sa lawak hinungdan dihang nakasud ang lalaki dali siyang migawas ug mihangyo sa room boy nga di siya pabiyaan tungod kay di maayo ang intensyon kaniya.
Tungod niini gisultihan sa room boy ang sundawo nga di maayo iyang gihimo.
Dihang mihidangat ang higala ni Jane gipa- hold ang sundawo ug gitawagan ang kapulisan sa Police Station 4 (PS4) sa Carmen ug gipadakop kini.
NAHUSAY
Gisuwayan og kuha sa
Sun.Star Superbalita ang police blotter sa PS4 apan giingon sa pipila ka pulis nga off the press kini ug wala kini sa blotter book.
Gibutyag sab sa pulis nga na- settle na ang kaso.
Tungod niini giklaro ni Jane nga way settlement nga mahitabo tungod kay andam siya nga mopasaka og kaso.
Anaa pa siya sa trauma nadtong tungora ug gitambagan sa pulis sa Womens and Children Protection Desk nga mohuwat lang sila sa desisyon niining mopasaka og kaso.
Ang suspek ning panahona ang nagtingkagol na sa prisuhan ug labihan ang pangayo og pasaylo ngadto sa biktima.
Samtang si Capt. Patrick Martinez, tigpamaba sa 4ID, gikatakdang mohimo og kaugalingon nga imbestigasyon labot sa insidente ug una na misulti nga di kini nila i- tolerate ang matang nga binuhatan.