Pista malinawon

(Napatik sa Superbalita Cagayan De Oro, Enero 10, 2017)

TALIWALA sa hulga sa seguridad ug sa pagbundak sa uwan atol sa prosesyon daghan gihapon sa mga deboto ang nisunod atol sa pista sa itum nga Nazareno. Nagpasalamat si Wenceslao “Toto” Salcedo, coordinator sa mga Hijos sa Itum nga Nazareno gumikan kay ubayubay gihapon ang miuban sa prosesyon bisan pa man sa nadawat nga hulga sa seguridad ug pagbundak sa uwan. “Kun sa ako lang ibutang nato nagparehaspa considering the fact nga dunay duha ka major nga rason, gauwan plus naay threat pero still ang tawo nagpadayon sa ilang pagpakita sa ilang pagtoo,” pahayag ni Salcedo sa pakighinabi sa Sun.star Superbalita.

“Nalipay ra gyud mi nga naa pa gihapo’y tumutoo nga nagpadayon sa ilang pagtoo unya nagmalinawon ta diri,” dugang pahayag ni Salcedo.

Samtang gidugang pa usab ni P/ Supt. Aaron Mandia, Chief operation sa Cagayan de Oro Police Office (Cocpo) sa paghinabi sa Sun.Star Superbalita nga sa iyang obserbasyon wa nahimong babag ang hulga sa seguridad sa mga deboto gumikan kay daghan pa gihapon kaayo ang miuban atol sa mga kasaulogan sukad pa sa pag- vigil.

“So far hindi makita natin yung in and out sa sports center hangtod sa pagdagan sa prosisyon hindi hindrance yung may threat,” dugang pahayag ni Mandia sa pakighinabi.

Kahinumduman nga adlawng Dominggo gipahibawo sa kapulisan nga mawala ang signal sa cellphone sa tibuok Cagayan de Oro tungod sa hulga sa seguridad.

Sa pagsuwat niini nga balita padayon pa ang kapulisan sa pagbantay ug paghatag og seguridad sa katawhan.

Samtang sa naandan, padayon pa sa pagpangtunol og pagkaon ang mga lumilihok sa simbahan ilabi na sa Nazareno ngadto sa mga vendors ug uban pa nga moduol ngadto kanila.