Liquor ban?
DILI ta makabasol ni Cebu City Mayor Tomas Osmeña kon iyang ipatuman ang pagsilot niining mga establisemento nga giingong nakasupak sa mga polisiya nga gilagda sa dakbayan atol sa Sinulog grand parade niadtong Dominggo.
Sa sayo pa aduna nay pahimangno ug balaod nga nagdili sa mga imnanan ilabi na dapit sa Gen. Maxilom Ave., F. Ramos St. ug Juana Osmeña Extension sa pagpahigayon og mga street parties atol sa Sinulog ug ingon man dili usab tugotan nga magbutang og loudspeakers atubangan sa imnanan.
Sigon sa taho, 17 ka mga establisemento, sagad mga bar ug restaurant, ang giingong mag-atubang og pagkasuspenso sa ilang mga business permits human kini makalapas sa maong lagda.
Aron pagkuha sa ilang habig, ang siyudad mopahigayon og imbestigasyon, sa dili pa sila masilotan.
Sa ato nang gikaingon, nga di kita kabasol sa mayor kon ipadayon ang pagpahamtang og silot sa 17 ka establisemento kay ila mang gipatugbabaw ang kagahi sa ilang ulo.
Pero kining laraw sa siyudad nga mopalabang og ordinansa o resolution nga ipatuman ang liquor ban sa Gen. Maxilom Ave., F. Ramos St. ug Juana Osmeña atol sa Sinulog grand parade mora man og dili makiangayon ilabi na sa nga negusyanting naapektohan.
Hatagan nato ang ubang dapit nga makapahigayon sa saktong selebrasyon, unya dunay mga piniling lugar nga daw gisilutan na daan? Asa man ang patas niini?
Ang inum kabahin na sa atong kultura sa matag selebrasyon ilabi na sa fiesta. Ang street party maoy angay i- ban sa hingpit. Asa ka mangita’g fiesta celebration nga way inum? Ang Mandaue City bitaw, bisan og dunay liquor ban panahon sa election apan padayon ang inum kay pista man.