Trying hard si Mike
BISAN pa man sa iyang kaparutan niadtong miaging eleksiyon, puwerte intawong paningkamot ni kanhi Mayor Michael Rama nga dili mawala sa eksena ug dili makalimtan sa mga botante sa dakbayan sa Sugbo. Samtang ang ubang mga pilderong kandidato nagpabiling nagpakahilum ug wala na mo-starring sa publiko, si Mike mosalida gihapon. Kanunay siyang mopatawag og press conferences ug motabi o motuki sa mga isyu nga bisan walay ayo o lami. Publisidad lang ang giapas. Bisan unsa na lang ang itabi nga walay klaro. Naa pay iyang inestoryahan nga magtuyoktuyok ug dili derekta sa punto. Ambot abogado man unta na siya pero dili man makamao mo-estorya. Dili makamao og public speaking. Daghan adlib nga wala na sa punto. Kon ikaw maminaw maglibog ka kay dili dayon masabtan ang iyang gipanabi.
Niadtong nagsingabot pa ang Sinulog nga mao pay iyang pag-abot gikan sa gawas sa nasod, nagpatawag dayon siya og press conference. Iyang gisaway ang preparasyon sa Sinulog labi pa ang pagpawong sa mga cellsites sa mga cellular providers. Dili kuno sakto ang gihimo sa kapulisan ug sa kasamtangang mayor nga pagpawong sa signal sa cellular phone gumikan sa hulga sa pagpamomba. Kay ang ilang gihimo nakapa-alarma sa katawhan.
Sa iyang paningkamot nga ma- expose sa publiko, mikuyog o mi- escort si Mike sa contingent sa Lumad Basakanon. Aber, unsa man ang iyang tuyo ug tumong? Aron lang siya makit-an og mahinumduman sa mga botante sa Sugbo? Siya ba ang misunod sa iyang ig-agaw nga si anhing Basak San Nicolas barangay captain George Rama nga maoy gi-ilang “amahan” sa Lumad Basakanon? O nakahatag ba kaha siya og amot alang sa maong contigent? O ba kaha kay naa siya magpuyo sa Basak San Nicolas? Para nako insignificant o dili tukma ang iyang pagkuyog sa contigent. Unya nagkamay-kamay o nagbabay-babay pa siya sa mga mitan-aw didto sa grandstand. Wala siya kaha mauwaw sa iyang gihimo nga morag wala may reaksiyon ang mga tawo sa iyang gihimo? Dako kadtong insulto kaniya kay morag wala siya pansina sa mga tawo. Trying hard intawon si Mike. Maayo kay wala siya gi-boo sa mga tumatan-aw. Maayo pa didto kuyog si Mike sa contigent sa Catbalogon City nga gipanguluhan ni Mayor Stephanie Uy Tan kay posibling mahugyaw pa ang mga tawo gumikan sa ilang pagya nga relasyon sa mayor. Gidungog nga aduna silay tinaguan nga relasyon. Ang akong tambag aning Mike, mas maayo pa siguro nga maghilum lang una ni siya. Unya na siya magsaba-saba og balik inig hapit na ang eleksiyon sa 2019. Mora man god og mogawas nga kining iyang gipanghimo “ulang lang siya sa pansin.”