Judicial ug extrajudicial killing

GILALISAN karon kon duna bay extra judicial killing (EJK) sa Pilipinas nunot sa gubat batok sa illegal nga drugas. Sa yanong pagsabot, ang EJK mao ang pagpatay nga di subay sa balaod, pagpatay nga wa mag-agi sa hukmanan. Apan wa may judicial killing sa Pilipinas.

Wa nay death penalty human sa pagpasar sa Republic Act No. 9346 nga nagdili sa pagpahamtang sa silot sa kamatayon dinhi sa Pilipinas nga giaprobahan ni kanhi Presidente Gloria Macapagal-Arroyo niadtong Hunyo 24, 2006.

Ang maong balaod nag- repeal sa Republic Act No. 8177 nga nagmando nga ang silot sa kamatayon ipahamtang pinaagi sa lethal injection, sa Republic Act No. 7659 nga nagpahamtang sa silot sa kamatayon, ingon man sa tanang mga balaod, orden ug dekrito nga nagpahamtang sa silot sa kamatayon.

Sa ato pa, ang nahibilin karon mao na lang ang reclusion perpetua o hangtod sa 40 ka tuig nga pagkabilanggo ug life imprisonment kon pagkapriso sa tibuok kinabuhi.

Ang Pilipinas mao ang ika-87 nga nasud nga nagdili sa pagpahamtang sa silot sa kamatayon tungod sa katarungan nga di kini epektibo sa pagwagtang sa mga linuog nga krimen. Lakip sa mga nasud nga nagwagtang sa death penaltycent mao ang Australia, Austria, Belgium, Canada, Denmark, Finland, France, Germany, Greece, Iceland, Italy, Luxembourg, the Netherlands, New Zealand, Norway, Portugal, Spain, Sweden, Switzerland ug United Kingdom.

Dunay lakang karon sa Kongreso nga ibalik ang silot sa kamatayon nga unang giwagtang sa 1987 Constitution. Debatehan pa kini didto sa House of Representatives. Ang nisupak niini niingon nga modaog sila kon ang tanlag sa mga magbabalaod maoy tumanon.

Si Albay Rep. Edcel Lagman, ang pangulo sa “Magnifi 7” minority bloc, niingon nga taas pa kaayo ang ilang lantugi apan bisan pa kon party vote ang tumanon, modaog gihapon sila.

Samtang si Speaker Pantaleon Alvarez niingon nga dako siyag kompiyansa nga mapasar ang balaod nga magbanhaw sa death penalty. Pero hayan nga moabot og 30 ka adlaw ang debate didto sa House of Representatives.

Si Ifugao Rep. Teddy Baguilat niingon nga daghang mga sakop sa supermajority nga supak sa pagpabalik sa silot sa kamatayon. “Many of our colleagues, their positions come from their strong personal convictions. That’s why we expect them, in spite of their being in majority, to interpellate, including the Makabayan lawmakers, who are part of the supermajority,” matod pa ni Baguilat.

Samtang si PBA Partylist Rep. Jericho Nograles niingon nga mas maayong unahon sa Kongreso ang papasar og mga balaod nga magdugang sa mga hukmanan, mga piskal ug mga public attorneys. Ang iyang gusto nga madali ang proseso sa hudikatora gikan sa pito ka tuig nga bista ngadto na lang sa di moabot sa usa ka tuig.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya gikan sa ala-una ngadto sa alas dos sa hapon sa sibyaan DYSS Superadyo sa RGMA network.)