Dawatdawat
Dear Noy Kulas,
Parte ni sa pinansyal ang akong problema, di sa gugma. Naa koy amiga nga suod kaayo nako kaniadto, apan nagkaway na mi karon. Tungod lang ni sa utang sa dawatdawat.
Duna mi dawatdawat sa amoang lugar nga kami rang mga manag-amiga. Ang ang kinauwahiang modawat unta. Siya ang nagkupot sa amoang fund.
Karon dihang modawat na unta ko, wa siyay gitahan nga kwarta sa akoa kay naa kuno siyay lain nga gigamitan. Nangayo siya nako og usa ka semana. Ang usa ka semana nahimong usa ka buwan. Hangtod nga ako na siyang gisingil kay ang among mga kauban gusto mohuwam. Unsa may akong ipahuwam nga wa siyay gihatag bisan usa ka dako? Nagkaaway mi tungod sa hitabo mga tulo ka buwan na. Wa mi tingganay hangtod ron.
Unsa may akong buhaton aron siya mapugos sa paghatag sa kwarta ngari nako nga wa na man mi magtagdanay? Maglikaylikay na siya kon magkasugat mi. Sa pobre nga pareho nako, dako na to nga kwarta. SENYA
Sen,
Mao bitaw na ang nakapait nianang dawatdawat kay daghan nang kwarta ang nadisgrasya niana. Unya lisod pa kaayo nang panilngon kon dunay makadispalko. Kon P10,000 ra ang kwarta, kon haguan nimo og reklamo, modako pa ang gasto.
Ipatawag na sa lupon sa barangay aron mo mahusay. Kana usa na ka lakang kon ugaling makahukom ka nga mogukod niya sa korte kay naa na may hukmanan nga mohupot niana karong ginagmay nga claims, sama sa utang, nga di dako og gasto. Ambot og duna na ba say nakasuway niana tungod kay sagad lagi, ang utang sa away giimpas. Magpaligas ang utangan aron di na makabayad.
Ang barangay mao ray imong paagi nga makasuway ka sa pagpaningil niya. Kon pakyas ka unya wa kay ikagasto, wa pay labot sa kahasol, ihug na lang na sa kalimot. Kana isip nga mapait nga leksyon sa kinabuhi. NOY KULAS