Everytime you go away
KINI si JP gitawag sa maong angga sa minubo niyang ngalan nga John Poe. Maguwang sab siyag usa ka tuig nako og third year college parehas kang Gino, pero sa laing university siya nagtungha. Di parehas namo ni Gino nga nag-eskuwela sa usa ka university. Human mag-aper sila si Gino ug JP, malipayon silang nagestoryahay. Kunohay nagbasa ko sa libro sa usa ko ka subject pero nagpaminaw ko nila. “Ayaw iloga si Mercy nako, ha, Gin? Love baya gyud nako siya.” Gipasiplatan ko si JP, nagtan-aw siya nako ug nangidhat pa. Gisiyokan ko siya sa akong mga mata.
“Asa ka love?” Hilom kong nagbagutbot. Pero sa tinuod lang, wa man koy kasuko kang JP.
Nganong masuko man ko niya nga wa man siya magbugalbugal nako? Ang nakaapan lang kay nagtuo ko nga kumedya ra ang iyang pagpangulitawo nako. “Ilogon? Di nako na mahimo, uy, JP, kay friend gud ta.” Mikatawa si Gino nga mitan-aw nako. Gingisloan ko siya. Sus, wa tingali love si Gino nako, da. Alkanse ko ani kay secret love ko man siya. Nakaingon ko sa akong kaugalingon. Pero wa na ko magtagad nila. Nag- concentrate na ko sa akong pagtuon, sa akong gibasa nga libro.
“Sige, biyaan ta na lang mo kay basig makabalda ko sa inyong pagtuon. Duna ra bay assignment ning akong mahal.”
Nakapanglingu-lingo na lang ko. Wa na ko motan-aw kang JP ug Gino. Nagpadayon ko sa pagbasa sa libro.
Dihang namatikdan ko nga mibiya na si JP namo, miinom ko sa akong juice. Seryusong nagtan-aw si Gino nako. Dugay ko niyang gitutokan. Nahikatawa ko ug nahapak ko siya sa iyang bukton.
“Naunsa ka diha, Gin?? Kalain gud anang imong tinan-awan nako? Mora mag gibasa mo ang nia sa akong hunahuna ug pagbati?”
“Well, gusto ko lang mahibaw-an kon love ba sab nimo si JP. Nagsulti ra ba siya nako nga pangasaw-on gyud ka niya inigkahuman natog eskuwela.”
“Pangasaw-on?” Mikatawa kog kusog. “Imposible nang mahitabo, uy, Gin. Di man ko niya uyab. Aside from that, di man tinud-anay ang iyang love nako? Imagine, iya man tuod kong gipangulitawhan pero di man siya seryuso. Klaro man nga kumedya ra. Sige lag katawa samtang nag-atubang mi.”
“Ingon gyud ana si JP, Mercy. Hingatawa gyud na siya. Nasuheto ko sa iyang kinaiya kay close friend ko man siya. Sige man mig estorya.”
Dugay kong gitan-aw si Gino nga seryuso kaayo. (SUMPAYAN)