P3 B ang kita sa Kapitolyo sa 2016

SA 2016, niabot ngadto sa P3.090 billion ang kita sa kagamhanan sa lalawigan sa Sugbo.

Tungod niini, nag-target ang Kapitolyo og P3.2 billion nga collection.

Wa pay labot niini ang posibleng kitaon gikan sa mga lote nga lakip sa land swap deal tali sa siyudad sa Sugbo.

Sa talaan sa Provincial Treasurer’s Office, moabot ngadto sa P3,090,786,666 ang kita sa Provincial Government gikan sa Enero hangtud Disyembre sa 2016.

Matod ni Acting Provincial treasurer, Emmanuel Guial, lakip sa nakapadako niini ang internal revenue allotment (IRA) nga moabot sa P2.5 billion sa tibuok tuig. Nakatampo sab ang kita sa Cebu South Bus Terminal nga moabot sa P69.5 million ug kita sa mga provincial ug district hospitals nga anaa sa P239.9 million.

Sigun ni Guial, maayo kini nga talimad-on ilabi na kay mas nilabaw ang ilang kita sa gitagana nila nga budget alang sa miaging tuig.

Karong tuiga, anaa sa P3.2 billion ang target collection sa Kapitolyo, diin ang target IRA nga ilang gilantawan nga madawat anaa sa P2.9 billion.

Gilantawan usab sa provincial treasurer nga mas dako ang ilang kitaon gikan sa CSBT ug sa mga gidumala nila nga tambalanan.

Hinuon gipadayag ni Guial nga di pa makapahimulos ang Kapitolyo sa mga posibleng kita gikan sa mga prime lot nga ilang makuha gikan sa land swap deal tali sa City Government sama sa 2.5 ektarya nga anaa sa South Road Properties ug laing anaa sa North Reclamation Area.

Matod niya, duna pay mga proseso nga agian aron hingpit nga mapuslan ang maong mga luna.

Kon di kini mahuman, hayan di pa kini mapuslan karong tuiga.