Black nasurpresa
GIHULAGWAY ni Meralco Bolts coach Norman Black nga ang ilang pagkuha kang Chris Lutz gikan sa San Miguel Beermen nga usa ka talagsaong hitabo.
Ang nakapasurpresa pa og samot kang Black kay ilahang nakuha ang usa sa dekalibreng magduduwa sa Philippine Basketball Association (PBA) gikan sa listahan sa unrestricted free agents nga wala’y baylo.
“I know it’s rare to get a player of his caliber from the unrestricted free agent list,” matod ni Black sa interbyu sa Spin.ph.
“That’s almost unheard of in the PBA, where the best players are always restricted with their mother teams.”
Si Lutz kanhi starter sa Beermen apan nawad-an og playing time human kini nakaangkon og sunodsunod nga pagkaangol.
Kini maoy hinungdan nga gibutang sa Beermen si Lutz sa listahan sa unrestricted free agents.
Gitataw ni Black nga sa dihang ilang nasayran ang sitwasyon ni Lutz, wala sila nag-usik og oras sa pagkuha niini. Ang nakaayo pa sa Bolts kay kasamtangang himsog si Lutz ug gilaumang makatabang kini og dako sa ilang kampanya.
Ang posisyon ni Lutz nga small forward maoy kasamtangang gikinahanglan sa Bolts.
Si Lutz miapil na sa praktis sa Bolts niadtong Martes apan giklaro ni Black kinahanglan nilang maghuwat nga mahibalikn sa hingpit ang kondisyon niini una kini nila paduwaon og sugod.