15 anyos `nanulis’, gibun-og sa mga tawo

NABUNOG ang menor de edad nga lalake nga giingong tulisan human giingong kulataha sa mga paryenti sa babaye nga iyang gibiktima.

Naglakaw kagahapon sa kaadlawon sa Ramona Village 1, Barangay Dumlog, dakbayan sa Talisay ang biktimang si Jeralyn Villacorta, hingkod, nagpuyo sa nahisgutang lugar.

Kalit nga nibabag sa iyang agianan ang suspek nga nga si Allan (di tinuod nga pangan), 15.

Sigun sa imbestigasyon sa kapulisan sa Talisay, gikan sa trabaho si Villacorta.

Samtang naglakaw kini padung mopauli, kalit lang nitunga sa agianan si Allan dayog babag ug nition kaniya og kutsilyo.

Gumikan sa kahadlok, napugos sa paghatag sa iyang bag si Villacorta ngadto kang Allan.

Sulod sa bag ang iyang tulo ka mga cellphone nga mokantidad ug P2,100, ATM cards ug importanteng mga butang.

Human ini, daling nangayog si Villacorta sa iyang mga paryente.

Human sa pipila ka oras nga pagsubay, ilang nakitan si Allan sa South Road Properties (SRP) habig sa Barangay Dumlog. Positibo siyang giila ni Villacorta. Nisuway pa unta sa pagsibat si Allan apan naabtan sa mga paryente ni Villacorta.

Matod pa nikisikisi hangtod nga nadapatan si Allan ug nakuha pagbalik ang mga butang nga gipanagiya sa biktima.

Lakip nga nakuha mao ang walo ka pulgadang kutsilyo nga gigamit ni Allan.

Gidala si Allan sa buhatan sa kapulisan nila ni Villacorta ug sa duha niya ka mga paryente si Allan.

Atol sa pagrikisa, nakuhaan si Allan og tulo ka gagmay nga pakite nga gituohang shabu nga gisulod sa bulsa sa iyang jacket.

Gibilanggo si Allan ug gikatakdang pasakaan og kaso.

Ang kapulisan nanawagan sa mga biktima sa pagpanulis sa pagadto sa ilang buhatan aron ilhon si Allan sanglit daghan na kinig nabiktima sa ilang lugar.