MGB mitumbok og mga dapit kuyaw puy-an

DI na luwas puy-an ang pipila ka mga lugar sa pipila ka mga sitio sa duha ka mga bukirang barangay sa dakbayan sa Sugbo human masusi ang mao nga mga dapit sa Mines and Geosciences Bureau (MGB) 7 niadtong Huwebes.

Matod sa MGB nga dunay mga dapit sa Barangay Busay ug Sirao nga di na angay puy-an sa katawhan tungod sa kapeligroso niini nga puy-an.

Gikinahanglan usab sa mga lumolupyo ang pagbakwit gilayon kon mag-uwan tungod sa kakuyaw sa landslide.

Lakip nga nasuta sa MGB 7 nga risgo nga mga sitio sa Sirao mao ang Kamandagan, Kambyo-os, Langub, Proper, Tawagan II, Tan-awan 1 ug Kan-irag.

Samtang sa Busay nasuta ang mga sitio sa Lower Busay, pipila ka dapit sa Kangmaya, Garahe, ug Kulo

Apan giklaro sa tigpamaba sa MGB 7, Marian Codilla, nga di ang tibuok sitio nga nahisgutan ang di na mapuy-an tungod kay aduna’y mga lugar nga mamahimo rang mapuy-an.

Niadtong Huwebes gibisita sa geologist sa MGB 7, Dr. Dennis Aleta, ang maong mga dapit nga nakasinati og pagdahili sa yuta sa dakbayan sa Sugbo.

Sa Busay diin 12 ka sakyanan ang apektado sa pagdahili sa yuta sa Sitio Garahe, di na makatabang ang mga kahoy ug magbutang og riprap kilid sa dalan.

Matod ni Codilla nga masinati gihapon ang pagdahili sa yuta sa dapit hilabi na kon ang ilawom niini mabasa sa panahon sa uwan.

Nasayran usab nga aduna’y pipila ka mga dapit sa Busay nga volcanic ang yuta mao nga risgo mahugno o modahili.

Dugang ni Codilla nga angay magbutang og signage ang kagamhanan sa dakbayana sa Sugbo sa dapit aron malikayan ang pagbutang og bisan unsa nga estraktura sa dapit.

Samtang nasayran usab nga ang ilawom nga bahin sa Sirao nag-irog pa.

Gibutyag usab ni Codilla nga sagol bas ug kulonon ang yuta hinungdan sa mga pagdahili.

Tambag sa MGB 7 nga di papuy-an sa mga tawo ang dapit nga dunay risgo.

“Residents are advised na if mag ulan na gani mo- evacuate na gyud sila kay mu saturate gyud ang yuta didto and report to MGB and local disaster units if they observe any movement. Local officials are also advised to develop early warning signals,” matod ni Codilla.