Nakatrabaho sa 2016 mas daghan

MIKANAOG ang unemployment rate sa Central Visayas sa 2016 kon itandi sa 2015 gumikan sa pagsaka sa gidaghanon sa mga tawo nga nakatrabaho.

Si Department of Labor and Employment 7 Director Exequiel Sarcauga nibutyag nga sa miaging tuig niabot og 95 porsiyento ang employment rate sa rehiyon siyete, mas taas og .9 porsiyento kon itandi sa 94.1 porsiyento sa 2015.

Samtang, gikan sa 5.9 porsiyento sa 2015, nikanaog sa 5 porsiyento sa nakalabay nga tuig ang unemployment rate sa Central Visayas.

Matod ni Sarcauga tungod kini sa daghang kahigayonan sa panarbaho sa rehiyon gumikan sa paglambo sa kahimtang sa ekonomiya diin daghan ang nagbukas nga mga establisemento.

Nag-una niini ang service sector kun mga hotel, restaurant, resorts ug turismo. Nagsunod ang manufacturing industry ug agri-fisheries sector.

“We’re able to generate that much of opportunity for region 7,” pamulong ni Sarcauga.

Siya nipahibawo nga atol sa tigom sa Regional Tripartite Wages and Productivity Board kagahapon, gipresentar niya ug sa mga opisyal sa Department of Trade and Industry ug National Economic and Development Authority ang data ug assessment bahin sa kahimtang sa ekonomiya sa rehiyon ug ubang impormasyon nga makagiya sa board kon angay ba o dili nga mohatag og umento sa suhulan sa mga mamumuo.