Naay isunod sa PDEA

PHILIPPINE Drug Enforcement Agency (PDEA) Regional Director Yogi Filemon Ruiz nipadayag sa iyang kasagmuyo sa 80 ka mga barangay kapitan sa siyudad sa Sugbo nga wa motabang kanila sa ilang kampanya.

Matod niya nga way bisan usa kanila ang mihatag og impormasyon labot sa paghitak sa illegal nga drugas sa matag barangay.

“Kon moingon sila nga active man mi sa kampanya, balikon pud nako silag pangutana, asa man inyong information? Dali ra kaayo pag-ingon nga active mo sa kampanya pero ang pangutana asa man ang inyong information nga naay mga durugista, naay namaligya ug drugas sa inyung lugar,” matod ni Ruiz.

Siya nibahad nga duna pay daghang kapitan nga ilang isunod sa pagkiha ug ang kaso sa Barangay Ermita sampol lamang.

Wa una motug-an si Ruiz kon kinsa ang isunod nila sa pagkiha ngadto sa Ombudsman apan iyang gipaniguro nga duna kon magpadayon sa pagmagahi ang mga opisyal sa barangay sa pagabag kanila.