Debosyon ipakita sa buhat: Fr. Nahara
SA pagtak-op sa ika- 452 nga kapistahan ni Señor Sto. Niño kagahapon, ang mga deboto giawhag nga dili lang kutob sa mga pulong ang ilang debosyon kon dili apil usab sa buhat.
Si Padre Pacifico Nohara Jr., nipalanog niini atol sa Hubo Mass nga gipahigayon sa Pilgrim Center sa Basilica Minore del Santo Niño kagahapon sa kaadlawon.
Gibanabanang 4,000 ka mga deboto ang nitambong sa Hubo Mass.
Ang hubo o ang pag-ilis sa biste sa Balaang Bata usa ka tinuig nga tradisyon nga ipahigayon sa matag unang Biyernes human sa kapistahan sa Senyor.
Si Nohara namahayag nga angay hinumdumannga ang Santo Niño nagtan-aw sa kinaladman sa kasingkasing sa mga tawo, nga way bisan usa ang perpekto.
Sa wali, siya nidasig sa mga tawo nga sa pagtapos sa kapistahan dili lang sila kutob sa selebrasyon sa ilang pagtuo sa Santo Niño kondili magsilbi kini nga paagi sa pag-usab sa kasingkasing ug paghimo og maayo sa uban.
“As we end the Fiesta Señor, may we be empowered by the Señor Sto. Niño in everything that we do and will do. And that may have the courage to change our heart,” dugang sa 43-anyos nga rector.
Ang ritual gisugdan pinaagi sa pagkuha sa korona, gisunod ang orb ug scepter ug dayon ang armlet, bands, kapa, tunic, inner garments ug botas uban sa pag-awit sa mga deboto.
Human sa paghubo sa biste, ang imahen sa Balaang Bata gikaligo sa tubig ug gipahiran og tualya ug dayon gisuloban sa beste, botas hangtod sa korona.
Ang Sandiego Dance Troupe niduyog sa ritual sa Hubo.