Mananga River palawman, tul-iron?

GISUSI ni Mayor Eduardo Gullas ug kadagkuan sa Department of Public Works and Highways (DPWH) sa 2nd Engineering District ang sapa sa Mananga.

Kini nunot sa tinguha sa siyudad nga ilang palawman ang sapa ug tul-iron ang agianan sa tubig paingon sa dagat aron dili na kini moawas kon adunay kusog nga uwan.

Ang lakang ni Gullas naaghat human sa kusog nga uwan sa miaging mga adlaw nga miawas ang sapa sa Mananga nga miresulta sa pagkabanlas sa upat ka mga balay.

Gatosan ka mga pamilya ang gipabiya kansang mga balay anaa daplin sa sapa ug kabaybayonan.

Si Gullas mipahibawo nga tinguha karon nila ang pagpalawom sa Mananga ug pagtul-id sa sapa aron mauli sa orihinal ang agianan sa tubig.

Sa pagkakaron, naglikoliko kini hinungdan nga kon dunay kusog nga baha mokankan kinig maayo resulta nga daghang mga prebadong luna nga ilang ilang yuta naagian na sa sapa.

Si Gullas uban ni Engr. Leslie Anthony Molina sa 2nd Engineering District nisusi sa Mananga nga nisubay sa barangay Lawaan-2 ug ilawom sa tulay.

Ang mayor mipadayag sa iyang kabakala sa situwasyon nga mga nagpuyo sa Gawad Kalinga human naguba ang spillway busa nitipas ang sa tubig sa suba.