2 bata naanod sa baha, patay nang nakit-an

TAGBILARAN City, Bohol - Duha ka lawas sa mga menor de edad nga mga lalaki ang napalgang wa nay kinabuhi dihang giingong naanod niadtong Lunes sa lainlaing lugar atol sa kusog nga bunok sa uwan sa probinsiya sa Bohol.

Sa pasiunang pakisusi gibutyag sa kapulisan nga ang mga biktima giila nga sila si Jomel Orivillo, 14, samtang ang usa mao si Roy Andales, 4.

Dugang sa kapulisan nga si Orivillo nakit-an nga naanod ngadto sa Barangay Sto. Tomas sa lungsod sa Talibon diin nalugpitan kini sa pipila ka mga kahoy.

Giingon nga ang biktima nadala sa kusog nga baha samtang kini naligo sa sapa sa Sto. tomas.

Samtang ang lawas sa kwatro anyos nga bata napalgan usab pagka-sunod nga adlaw gikan nahitabo ang insidente.

Ang biktima nakaplagan sa may kadagatan didto sa lungsod sa Bien Unido.

Matud pa sa ginikanan sa biktima nga aksidenteng nadakin-as dayong nahulog ang bata ngadto sa sapa didto sa Barangay Cabiguhan sa ilang lugar tungod sa kakusog sa tubig.

LTB