Leyeco mo-loan alang sa proyekto
ORMOC CITY, Leyte - Gidungog sa Energy Regulatory Comission (ERC) ang plano sa Leyte Electric Cooperative (Leyeco) V ang planong pag- loan alang sa dugang proyekto.
Si Engr. Michael Guiñares sa Leyeco V, mibutyag nga gikinahanglan karon ang pagtukod og dugang substation nunot sa dagkong establisemento nga giktakdang itukod sa Ormoc City. Kini mao ang Robinsons, SM Center ug City Mall. Dugang ni Guiñares nga ang Ormoc Substation adunay capacity nga 18 megawatt ug karon anaa na sa 17 megawatt ang nagamit.
Sa gikatakdang pagtukod sa nahisgutang mga establisemento, di na makaya sa substation ang gikinahanglan nga kuryente niini.
Nasayran nga ang Robinson Place nagkinahanglan 3 megawatt nga kuryente, usa ngadto sa 2 megawatt naman sa SM center ug 500 kilowatt ang bana-bana sa para sa City Mall.
Ang pagtukod og laing substation gipaubos sa Emergency Capital Expenditures (CAPEX).
Nangayo usab ang Leyeco V og provisional authority sa ERC alang sa plano nga pag loan og P94, 040, 806. 7.
Ang kantidad gibahin bahin alang sa 20MVA Ormoc Substation, 10MVA Palompon Substation, construction sa 69KV line para sa planong 10MVA Palompon substation, Accounting computerization system, Reliabilitt analysis software ug Short circuit analysis software. Gihatagan karon og 15 ka adlaw ang sa ERC ang Leyeco V alang sa pagsumiter sa ubang dokumento.