Daghang salamat, Sr. Sto. Niño

KINASINGKASING nga pasalamat ang gipadayag ni Rev. Fr. Pacifico Nohara Jr. sa malamposon nga pagpahigayon sa kapistahan ni Senyor Santo Niño. Ang kapistahan gibuksan sa Walk with Jesus niadtong Enero 5 ug gitapos sa Hubo sayo gahapon sa buntag. Ang tradisyonal nga Hubo kun pag-ilis sa sapot sa Balaang Bata atol sa Santos nga Misa. Daghang mga deboto ang nihugop atol sa seremonyas. Ang uban nila nagdala og mga imahen. Sa akong interview, gipasalamatan ni Padre Nohara ang katawhan nga bisan sa daghang pagsulay, wa gyud molunga pagpadayag sa ilang debosyon ug aktibong nisalmot sa daghang mga kalihukan sa iyang kapistahan. Lakip nga iyang gipasalamatan ang mga tawo nga nilangkob sa mga komitiba nga nag-atiman sa daghang gimbuhaton. Ang kapulisan, militar, Coast Guard, Cebu City Govt. ug volunteers nga nihalad sa ilang panahon pagtunol og siguridad sa tanang kalihukan. Ang iyang mga kauban sa simbahan nga niunong kaniya ilabi na niadtong makutas nga mga gutlo sa selebrasyon. Kini mao ang mga hulga sa pagpamomba, ulan ug bagyo.

Giangkon ni Padre Nohara nga nibati siya og kahadlok sa dihang nitumaw ang mga tabi tabi labot sa pagpamomba nga niresulta sa tinuyo nga pagpawong sa signal sa cellphone kay kini maoy gituhoan nga gamiton sa pagpabuto sa bomba. Ang kagamhanan sa dakbayan sa Sugbo nga diha kanunay sa kiliran ni Padre Nohara sama kang Konsehal Dave Tumulak ug PRO-7 Regional Director Noli Taliño lakip nga iyang gipasalamatan. Nasabtan nako ang iyang sitwasyon. Di sayon nga mangulo og ingon niadto nga kalihukan. Maayo unta og piyesta lang kadto og usa ka parukya. Matod ni Padre Nohara gidungog ni Sto. Niño ang mga pag-ampo sa iyang katawhan. Atong nasaksihan nga taliwala sa mga pag-ulan tungod sa bagyong Auring napahigayon ang Fluvial ug Solemn Procession samtang nagmug-ot ang langit tungod sa ka baga sa dag--um. Pagka Dominggo ang iyang kapistahan , hilabihan ka nindot sa panahon nga maisip nga usa ka dakong milagro. Ang Pag-asa nagpasidaan na og mga pag-ulan nga masinati sa maong adlaw apan gitapos ang Grand Sinulog Parade lahos na sa street party. Ingon ana kagamhanan ang Balaang Bata.

SIGNAL

Tungod kay way signal bisan unsa nalang nga diskarte ang namugna. Samtang nagtambong ko og Pontifical Mass nga gidumala ni Bishop Jose Palma sa Basilica nakamatikod ko nga dunay mga batan-on nga nagsige og wara wara sa dala nilang signage. Karton nga gisulatan og duha ka ngalan, Toni ug Mae Jane. Duna silay gipangita. Human sa misa, akong gisusi ug nasayran nga ila diayng gipangita ang ilang mga kauban nga sila si Toni ug Mae Jane. Tungod kay way signal kadto nga paagi ang ilang nahunahunaan. Sa sige nilang wara wara sa karatula nakabasa si Toni ug nagkita sila. Sa akong pagbiya si Mae Jane nalang ang padayon nilang gipangita. Epektibo nga diskarte. Kon may signal pa unta usa ra ka pislet sa cellphone sila si Toni ug Mae Jane.