Pamatud-i

NAKUGANG sila si Cebu City Ermita Barangay Captain Felicisimo “Imok” Rupinta ug kaubanan dihang masayod nga niluwat og unom ka buwan nga preventive suspension ang Ombudsman Visayas.

May labot kini sa pasangil sa Philippine Drug Enforcement Agency (PDEA) 7 nga wa magtagad sila si Rupinta ug kaubanan sa ronda sa miaging tuig sa usa ka shabu tiangge sa dapit.

Bisan gani ang Carbon police station naapil sa lahap kay duol ra sa ilang buhatan ang tiangge apan wa maronda. Pipila ka mga pulis ang gipangbalhin gikan sa police station, labina niadtong dugay na sa mao nga buhatan.

Namasangil si Rupinta nga dunay nagpaluyo nga pulitiko kay matod niya, di tinuod nga wa sila maggunok atol sa ronda.

Ang Ermita usa sa pipila ka mga barangay sa Cebu City nga dunay taas nga presensya sa illegal nga drugas.

Daghan na ang mga ronda nga gipahigayon sud sa mao nga barangay apan ang drugas, way hubashubas.

Kining gitumbok sa PDEA 7 nga wa pagpakabana sa mga opisyal sa Ermita nahitabo usab sa ubang mga dapit, diin ang mga opisyal wa magpakabana sa pag-abag sa mga awtoridad nga nangronda.

Kining kaso karon nga gipasaka sa PDEA batok sa mga barangay official sa Ermita angay nga panaminan sa uban. Angay na silang mahadlok.

Maayo unta kon di tinuod ang pagduda ni Rupinta nga dunay pamulitika kining kaso nga ilang giatubang.

Aron pamatud-an sa anti drug agency nga di tinuod ang pasangil ni Rupinta, ikiha usab nila ang ubang mga mga barangay official nga di ug wa moabag sa ilang mga ronda ug kampanya.