Everytime you go away
(Ikaupat sa pito ka mga gula)
MILABAY pa ang mga adlaw. Sige kog huwat nga pangulitawhan ni Gino apan wa gyud niya kini buhata nako. Gipatas-an ko pa ang akong pasensya. Malipayon man gihapon ko kanang magtuon mi sa among klase sa among lawn. Nahunahuna nako nga nangita lang tingalig hustong higayon si Gino sa pagpadayag sa iyang love nako.
Usahay magtupad mig lingkod sa swing ug magkadikit gyud ang among lawas. Ganahan ko samtang tabyug-tabyugon namog hinay ang swing. As usual, magduwa mig table tennis kon Domingo. “May uyab ka na, Gin?” Kausa, wa na ko makapugong sa pagpangutana niya samtang nag-atubang mi. Diha mi sa school canteen niadtong tungora. Vacant period namo. “Uyab? Sus, wa pa, uy, Mercy.” Nalipay ko sa akong nadungog. Dako pa gyud diay og chance nga mahatagan og katumanan ang akong hilom nga paghigugma kang Gino. “Ikaw, Mers, kanus-an mo sugta si JP?” Nauknol ko sa akong gilingkoran. Hapit ko matuk-I sa gikaon nakong hopia. Dali kong miinom sa akong softdrinks. Nakatan-aw ko pag-ayo kang Gino.
“Nganong si JP man gyud, Gin? Di man lagi tinud-anay nang iyaha nako.” Kalit nga nawad-an kog maayong mood. Naglagot ko sa hilom kang Gino. Nganong gusto man gyud siya nga mahimo kong boyfriend ni JP, uy?
“Aw, ikaw gud. Basta para nako, buotan si JP ug angayan mong pareson. Di gyud ka magbasol kon mauyab mo siya.”
“Di na ta maghisgot niya, uy, Gin. Manggawas na nuon ta dinhi sa canteen.” Wa ko na huwata ang tubag ni Gino. Mitindog ko ug mibiya niya. Sa dayon ko nang gawas sa pultahan, gilingi ko si Gino. Nagpabilin gihapon siyang naglingkod ug nagtan-aw siya nako. Wa siya mosunod nako. Misamot ang akong kalagot. Mipadayon ko paggawas sa canteen.
Pagka gabii, namisita si JP nako. Giatubang ko siya sa among sala.
“Kining, JP, tell me the truth, gihimo mong bearer si Gino, no, para nako?” Wa koy maayong buot.
“Di, uy, Mercy. Wa ko magkinahanglag bearer sa pagpangulitawo ko nimo. Gusto kong ipakita nimo nga love ta gyud ka sa way pagpangayog tabang sa uban.” “Mao ba.” Gitan-aw kog dugay si JP. Nagtinutokay mi. As usual, mapahiyumon siya nako. Morag iyang gipakita nako kanunay nga malipayon gyud siya kon magkaatubang mi. “Pero di tika love, JP.” Giprangkahan na gyud nako si JP. “Si Gino ba ang imong love, Mercy?” Kalit miseryuso si JP. Gitando ko siya.
(SUMPAYAN)