Usa sa mga top 10 pushers nadakpan
NASIKOP ang duha ka gikatahapang mga drug pusher, usa niini apil sa top 10 drug personalities sa Cordova, pasado alas 9 niadtong Huwebes sa gabii sa Sitio Lantuge Bangbang, Cordova.
Ang mga suspek giila nga sila si Antonio Macan, 33, nagpuyo sa nahisgutang dapit ug Wilson Salazar, 30, taga Sitio Matabang, Barangay Dayas sa mao nga lungsod.
Matod ni SPO1 Elezar Llanes sa Cordova Police Station, ang grupo ni P/ Sr. Insp. Clemente Ceralde nagpahigayon og buybust operation sa dapit diin si Macan nagpuyo.
Ilang naaktohan sila si Macan ug Salazar nga namaligyan og illegal nga drogas.
Nakuha gikan kan Macan ang tulo ka mga bulto sa gidudahang shabu ug buybust money nga P500.
Samtang nakuha usab sa possesion ni Salazar ang duha ka bulto sa gidudahang shabu.
Ang tanan gibanabanang mobalor og P287,500.
Si Llanes nagkanayon nga anaa na ang duha sa ilang watchlist.
Si Macan usa sa top 10 drug personalities sa Cordova nga ilang gi sumiter sa Police Regional Office 7 (PRO7) karong buwana.
Dugang ni Llanes nga sa dihang gipangutana nila ang mga suspek kon asa sila magkuhaan sa shabu nga ilang gibaligya ,niingon kini nga sa dan A. Lopez, Labangon, dakbayan sa Sugbo.
Natanggong sa Cordova Police Station ang duha samtang giandam ang kasong kalapasan sa Comprehensive Dangerous Drug Act of 2002 o kalapasan sa paghupot ug pagbalikya sa illegal nga drugas.