GIPATAY SA TRES
GIPAUWANAN og 19 ka triples sa Cleveland Cavaliers ang Phoenix Suns aron kuliton ang 118-103 nga kadaugan sa nagpadayon nga NBA season. Si Kyrie Irving mitali og 26 puntos, duha niini tres, alang sa Cavs apan ang pagpangigo sa gawas nga bahin maoy nagpasawop sa Suns. Lima ka Cavaliers ang nakapabuto og labing minus tag duha ka triples nga gipangulohan sa lima ni Iman Shumpert. Sa pagpalta ni Kevin Love, sila si Channing Frye ug James Jones pulos adunay tag upat ka triples ug midugang usab og tulo ka tres si Kyle Korver. Ang 26-6 nga rally sa uwahing bahin sa second quarter ang naghatag og 21 puntos nga labaw sa Cleveland ug gitapos ang halftime sa 59-41 nga bintaha. Sa dihang ang Suns mipakubos sa biya ngadto sa 12 puntos na lang, si LeBron James mao na usab ang miduslit sa 12-5 nga rally aron ibalik sa pagpabukad ang labaw, 116-97, sa katapusang dos minutos.
Kuwang na lang sab og usa ka rebound nga maka triple-double ang four-time MVP human kini motapos sa duwa nga may 21 puntos, 15 ka assists ug siyam ka rebounds.
Ang Cleveland mipasaka sa ilang record ngadto sa 30-11 samtang naunlod ang Suns sa 13-29 nga baraha.
Sa laing duwa, gimaniobra ni Goran Dragic ang second half ug nangulo kini sa darong rally sa fourth quarter aron agakon ang Miami Heat ngadto sa 99-95 nga kadaugan batok sa Dallas Mavericks.
Si Dragic mitapos sa duwa nga may 32 puntos apan ang 22 niini diha niya mahimo sa second half nga sa samang higayon maoy nagputol sa tulo ka sunodsunod nga kadaugan sa Dallas.
Nabiyaan og 73-70 sa fourth quarter, ang Miami mipaulbo og 12-2 nga raly aron papason ang nuebe puntos nga labaw sa Dallas.
Hinuon natabla sa Mavericks ang score, 8282. Sa tungatungang bahin sa maong quarter.
Apan ang nadilaab nga kainit sa mga kamot ni Dragic kinsa mipabuhagay og sunodsunod nga puntos maoy nahimong likuanan sa kadaugan sa Heat.
Si Dirk Nowitzki mitali og 19 puntos sa Dallas kinsa nahagsa sa 14-28 nga baraha.