Beermen vs. Batang Pier sa Lapu-lapu
Duwa karon: 5:00 pm. - San Miguel vs. GlobalPort
NAKAPAKITA man tuod sila og saktong dominasyon sa ilang mga nangaging duwa, apan alang kang Terrence Romeo, ang numero unong hinagiban sa GlobalPort Batang Pier, dili pa kini maoy igong kabasehan sa nagkataas nila nga performance.
Karong hapon, ang GlobalPort makigsangka sa league-leading San Miguel Beer diha sa Hoops Dome sa Lapulapu City sa usa ka outofgame nga gihulagway ni Romeo nga maoy igong sukdanan sa ilang kahanas.
“Ito talaga ang basehan, kasi San Miguel is a champion team. Tingnan natin kung magawa ba natin yung nagawa natin sa iba at saka malaman natin kung may chance ba tayo,” matod ni Romeo.
“At least matitikman natin kon gaano maglaro ang champion team,” dugang sa Sugboanong basketbolista apan didto na magdako sa Manila.
Hinuon sukad sa pagsugod ning season, maayo ang gipakita ni Romeo ilabi na sa iyang pagpakigsawo sa iyang mga kauban.
Batok sa NLEX Road Warriors nakapabuhagay man tuod sila og 22 puntos sa first half lang, apan sa sunod nga mga quarters ang iya na usab nga mga kauban nga sila si Stanley Pringle, JR Quinahan ug Papot Paredes ang mibida aron siguroon ang kadaugan.
Alang ni Romeo nga ang iyang paghatag og igong panahon sa iyang kauban maoy kabahin sa dakong kauswagan sa ilang team.
Ang GlobalPort, sa kasamtangan, anaa sa ikaduhang puwesto nga may 5-3 nga baraha kauban ang Rain or Shine Elasto Painters nga padayon pang nagduwa hangtod ning pagsulat batok sa Meralco Bolts.
Samtang ang Beermen nga gipangulohan ni three-time consecutive MVP awardee ug Sugboanon nga si June Mar Fajardo adunay impresibong 8-1 nga baraha ug nakasiguro na kini og luna sa sunod round.
Apan bisan pa man niini, gipaabot nga mopakita og saktong kayod ang Beermen aron sa dugang pagpalig-on sa ilang paghupot sa liderato.