TIGHIMOG PEKE SIKOP

BSP, Tumulak nakasakmit og P24T nga pekeng kwarta

GIINGON nga tigbuhatan ug namaligya og mini nga kwarta, nasikop sa awtoridad kagahapon sa dan Colon, dakbayan sa Sugbo pinaagi sa buy bust operation.

Ang nasikop mao si Junrey Cagay, 28, residente sa Barangay Quiot, ning siyudad.

Matod sa representante sa Bangko Sentral ng Pilipinas (BSP) nga si Agent Miles nga ang operasyon resulta sa ilang kapin usa ka semana nga pagpahigayon og surveillance human sila makadawat og impormasyon nga naghitak ang pagbuhat og peke nga kwarta sa siyudad sa Sugbo hinungdan nagpadala sila og operatiba gikan sa BSP.

Dugang ni Agent Miles nga sa una nilang transaksiyon kang Cagay, wala ni dala nga peke nga kwarta maong nagpadayon ang ilang pagpaniid.

Kagahapon sa udto dihang subli silang nagkita ug gidakop si Cagay ug nakuha sa posisyon niini ang counterfeit bank notes.

Usa ka joint operation sa nagkalain-laing unit sa kapulisan ang gihimo nga gilangkuban sa BSP Investigation Division, RIU 7 ug Carbon Police Station kon diin gidala ug gibalhog sa prisohan si Cagay.

Si Cagay, sa iyang bahin, niingon nga di pa lang siya dugay nga maghimo og peke nga kwarta.

Buhaton niya kini sa computer shop ug siya ra ang mohimo tungod iya rang ipa- print.

Giingong way nagtudlo ana niya ug igo lang siya nag- research sa pagbuhat niini.

Dili na unta siya mopadayon sa pagbuhat niini apan ang iyang customer maoy mienganyo kaniya nga mohimo pa.

Ang baligya niya sa peke nga kwarta: tag P100, P200, ug P500 mapalit sa kantidad nga P20; ug ang P1000 sa kantidad nga P50.

Ang pamaagi sa pagbaligya niini siya'y moadto sa iyang mga kostumer.

“Kahibawo man ko (fake) mao bitaw dili kaayo ko moanha sa Colon kay kanang mahibaw-an ko. Wala naman ta ko nipadayon. Niingon man ang costumer nako nga pagbuhat pa,” matod niini.

Subay niini, si Agent Miles niingon nga ang operasyon nga ilang gihimo kabahin sa mga lakang nga gihimo sa BSP ug ubang law enforcement agencies aron mahunong na ang ingon niining binuhatan.

Gihulagway usab niya nga gikinahanglan nila ang tabang sa katawhan aron dili maghitak ang peke nga kwarta ug importante usab matod pa ang information dissemination kon unsaon nga mahibaw-an nga peke ang kwarta.

“Sa mga nakikinig ngayon, tingnan natin yung bank notes. Kapaan natin. So if it’s rough to the touch its indicator that it’s a genuine bank notes. If it’s smooth to the touch, yun pa yung pekeng bank notes kasi po kadalasan yung counterfeit(ers) natin ngayon gumagamit lang ng commercially available papers like bondpapers. Minsan yung onion papers,” sigon ni Agent Miles.

Samtang si Cebu City Councilor Dave Tumulak, deputy mayor for police matters, niasoy sukad pa niadtong buwan sa Disyembre daghan na og reklamo mahitungod sa peke nga kwarta nga mikatap sa siyudad.

Gitataw sa konsehal nga dili lang kay si Cagay ang sikupon sa awtoridad, lakip na ang tindahan nga nagprinta niini tungod kay dako man kini og tulubagon dungan sa pag-ingon nga grupo sa sindikato ang naghimo niining peke nga kwarta.

“Dunay investigation nga gihimo sa pagkakaron ang atong kapulisan kay dili ta makatugot nga ang atong siyudad sa Sugbo masudlan niiining counterfeit money kay usa kini ka sa makadaot sa atong ekonomiya unya nagangat na sad raba ang atong Barangay Election. Dili ta gusto simbako mao unya ni ang gamiton. So, atong ning gipugngan gyud” matod ni Tumulak.

Gihimug-atan sa BSP nga duna silay gihimo aron dili dali nga makopya.

Gani ang bag-ong kwarta karon dunay 13 ka security measures ug kini maoy hinungdan nga nag- demonetize sila aron i- upgrade ang security measures.

Si Cagay mag-atubang og kasong kalapasan sa Article 168 sa Revised Penal Code kun illegal possession ug paggamit og pekeng kwarta diin ang silot niini unom ngadto na sa napulo ka tuig nga pagkabilanggo.