Asawa allergic sa bana; sigeg kaospital
SUKWAHI sa ubang managtiayon, wa maguban sa kwarto ug lisod ang sitwasyon nila ni Johanna ug Scott Watkins tungod kay ang usa nila dunay talagsaon nga sakit.
Si Johanna gidid-an sa iyang mga doktor nga makig-uban sud sa lawak sa iyang bana.
Siya allergic sa iyang bana.
Bisan sa kalisod sa ilang kahimtang, wa mabungkag ang ilang kaminyuon.
Gani, si Scott, usa ka full-time nga maestro, mopauli sa ilang balay ug maoy magluto niya og panihapon matag gabii.
Duha lang ka mga sudan ang gitugot nga makaon ni Johanna, ang beef stew ug organic lamb.
“There is no easy way around this problem, I want to keep Johanna safe and me going to see her compromises her safety,” nisulti si Scott sa BBC nga gitaho sa Mirror News.
Si Johanna, gikan sa Minnesota, Estados Unidos, adunay sobra sa 100 ka lainlaing allergies.
Gumikan sa iyang kondisyon, dili na maihap kon kapila siya nalandig sa ospital human siya nakasinati og anaphylaxis, usa ka seryuso nga allergic reaction nga mahimo makamatay sa tawo.
Siya nag-antos usab sa Mass Cell Activation Syndrom (MCAS), usa ka talagsaon nga immune system disorder nga nagpasabot nga allergic siya sa halos tanang mga butang.
Si Johanna, 29, kasamtangan nagpuyo sa lawak sa balay sa iyang higala, diin selyado ang mga pultahan ug bintana ug dunay air purification system.
Siya tugtan lang makabiya sa lawak kon moadto sa ospital o makigkita og doktor.
Nagkagrabe ang kondisyon ni Johanna kay bisan kon naa siya sa ikatulong andana nahimutang, makapanimaho gihapon siya nga dunay naghiwa og bombay sa kusina.
Ang MCAS, usa ka kondisyon nga sa kasamtangan way kaayohan nga dunay pipila ka timailhan sama sa pagubo, cramping, pagkahilo ug kanunay bation og katugnaw.