Banay sa napatay sa PDEA moreklamo

HUSTISYA ang gipangayo karon sa pamilya sa napatay sa sakop sa Philippine Drug Enforcement Agency (PDEA) 7 nga si Niño Rodel Taboada niadtong Huwebes sa gabii sa Barangay Duljo Fatima, dakbayan sa Sugbo.

Gikatakda nga mosang-at og reklamo ang pamilya ni Taboada sa Commission on Human Rights (CHR) 7 batok sa naasoy nga ahensiya.

Gihangop hinuon ni PDEA 7 Regional Director Yogi Ruiz ang plano sa pamilya aron usab malimpyohan ang pangan sa PDEA 7 kabahin sa isyu.

“I’m very much welcome sa move if mo- file sila og case, para macleared pud ang among pangalan, aron mahibaw-an, makita ang surveillance reports,” matod ni Ruiz.

Dugang niya nga gi- monitor unta sa pamilya ang lihok ni Niño Rodel aron makita nila kon unsa ang binuhatan niini.

Matod sa direkor nga niadtong unang semana sa Disyembre pa nila gipanid-an si Niño.

Samtang ang amahan ni Taboada, nga si Rolando kinsa kasamtangan nga anaa sa nasod sa Qatar, nagkanayon nga sa Lunes mosang-at og kaso batok sa PDEA 7 ang kabanay niya dinhi sa Sugbo sa CHR 7.

Si Rolando, kinsa nahinabi sa sibyaanang Bombo Radyo, nagkanayon nga dili siya makauli dinhi bisan sa kamatayon sa iyang anak.

Iyang gikaguol kaayo ang kalit nga panghitabo.

Usa ka silingan ni Niño kinsa nagdumili sa paghatag sa iyang ngalan alang sa iyang proteksyon, nibutyag nga but-an nga silingan ang napatay.

Dugang niya nga bag-ong ligo si Niño atol sa hitabo ug paingon unta mo- duty sa call center.

Nitataw usab siya nga magduwa ra og basketball si Niño ug wa nalambigit sa ilegal nga drugas.

Samtang ang uyoan ni Niño nga si Edward, nipadayag usab sa iyang kahiubos kang Ruiz.

Matod ni Edward nga di daghang ebidensiya ang gipakita sa PDEA 7 sa mga tigbalita diin giingon nga giplantiran ra iyang pag-umangkon.

Gianugnan usab siya tungod kay dako pa unta og kaugmaon ang iyang pag-umangkon.

Ang iyaan ni Niño nga si Susan, nitataw usab nga kon nalambigit pa sila sa ilegal nga drugas hayahay na unta ang kahimtang sa iyang pag-umangkon. Gisuwayan pagtawag sa Superbalita Cebu ang hepe sa Mambaling Police station aron masuta kon apil sa ilahang listahan sa drug personalities si Niño, apan wa motubag sa text ug tawag.