Imok, kauban miduso sa ilang motion

GIDUSO na sa kampo ni Kapitan Felicisimo “Imok” Rupinta ug pito ka mga konsehal ang ilang motion for reconsideration ngadto sa Office of the Ombudsman Visayas.

Si Rupinta ug mga konsehal wa makauyon sa hukom sa Ombudsman nga ipaubos sila sa preventive suspension sulod sa unom ka buwan gumikan sa pasangil.

“Among gikwestyon ang iyang (Ombudsman) desisyon kay ang iyang gituohan ang allegation ra man. It’s not an evidence. Wala may saksi ug wala sila’y affidavit sa witness. Sila (PDEA) ra mismo ang nireklamo,” padayag ni Rupinta.

Gikwestyon usab nila ang unom ka buwan nga pagkasuspenso sanglit gipadayag sa ilang kampo nga labing taas nga preventive suspension molanat lang og 60 ngadto sa 90 ka adlaw.

Gibutyag ni Rupinta nga base sa balaod, hatagan sila og 15 ka adlaw sa pagtubag para makapadayag sa ilang habig human nila madawat ang desisyon.

Gipadayag sa kapitan nga di tinuod ang pasangil sa Philippine Drug Enforcement Agency (PDEA7) nga wala sila motabang, inay gibalibaran ang ilang tanyag atol sa operasyon.

Matod niya nga usa sa iyang mga konsehal ang didto sa sityo Bato dihang nilusad og drug operation ang PDEA 7.

Nangutana pa kini og unsay ilang matabang, apan gibalibaran sa raiding team.

Sa pagkakaron, si Rupinta ug pito ka mga kagawad padayon nga naglihok sa barangay subay sa ilang opisyal nga sugo sanglit wala pa ipatuman sa DILG ang hukom.

Gipadayag nila nga kon dili sila molihok, mag-atubang sila og dugang sumbong gumikan sa pagpasagad sa ilang trabaho.

Gitug-an ni Rupinta nga kon wala silay madawat nga tubag gikan sa Ombudsman tulo ngadto sa upat ka adlaw (sugod Lunes), moduso sila og temporary restraining order ngadto sa Court of Appeals (CA) aron pugngan ang pagpatuman sa suspensyon.