Way relocation site, squatters sa Mananga di mopahawa

DAKBAYAN sa Talisay way relocation site alang sa mga nagpuyo kilid sa sapa ug kabaybayonan, hinungdan nga dili mamahawa ang mga pamilya nga nagpuyo.

Apan si Mayor Eduardo Gullas miingon nga bisan pa og adunay relocation site ang gobiyerno maglisod gihapon sa pagpapahawa sa maong mga pamilya.

Si Konsehal Raul Cabañero, presidente sa Association of Barangay Council (ABC), miingon nga panahon na nga angayang tutokan sa kagamhanan sa dakbayan ang relocation site alang niadtong nagpuyo kilid sa kasapaan ug kabaybayonan.

Aron dili sila magmagahi sa pagpahawa ilabi na karon nga adunay hulga sa kalamidad.

Matod niya nga sa iya lang barangay adunay dili mominus 30 ka mga pamilya ang iyang giila nga nagpuyo sa danger zone area.

Apan matod niya nga nagmagahi kini tungod kay dili usab sila mobiya sa ilang balay.

Nagkanayon si Cabañero nga dili lang kini suliran sa iyang barangay apan sa uban usab nga barangay nga nagsubay sa Mananga river.

Hinungdan nga angayan nang tutokan sa gobiyerno ang relocation site tungod kay dili usab siya makabasol kon dunay dili mobiya kon papahawaon tungod kay wala man usab silay kabalhinan.

Si Cabañero miingon nga maayong ubos sa administrasyon ni Gullas mas maayong maghiusa sila aron masulbad ang maong problema pinaagi sa paggahin og budget aron ipalit og luna alang sa relocation site.

Si Gullas miingon nga mao kini karon ang ilang gipaningkamotan apan siya nagtuo nga aduna gihapoy mga pamilya ang lisod papahawaon tungod sa rason nga malayo sila sa ilang gitrabahoan ug eskuylahan sa ilang mga anak.