Mercado gihulipan isip chairman sa Board

GIHULIPAN na si Rene Mercado isip chairman sa Metro Cebu Water District unom ka buwan human nilingkod si Mayor Tomas Osmeña isip pangulo sa dakbayan sa Sugbo.

Nipuli kang Mercado mao si Joel Mari Yu, consultant ni Osmeña ug kanhi pangulo sa Cebu Investment Promotions Center nga marketing arm sa South Road Properties (SRP) atol sa eleksiyon niadtong Enero 5.

Apan dili hingpit nga mawagtang si Mercado, kinsa tinudlo ni kanhi Mayor Michael Rama sa MCWD, sanglit siya maoy kasamtangang vice-chairman sa maong government-owned and controlled corporation.

Gawas kang Yu, miyembro sa Board niadtong 2008 sa MCWD, gitudlo usab nga board member si Atty. Ralph Sevilla nga kaalyado gihapon ni Osmeña.

Si Mercado nilingkod sa MCWD isip chairman niadtong tuig 2011, usa ka tuig human nidaog si Rama atol sa iyang unang termino isip mayor sa dakbayan.

Usa sa dakong nabuhat sa administrasyon ni Mercado mao ang pagsilyado sa P600 milyones nga Supervisory Control and Data Acquisition system alang sa MCWD gikan sa Japan International Cooperation Agency (JICA).

Laing proyekto mao ang P376 milyones nga pro-poor water supply project sa MCWD ug Vitens Evides International diin lakip niini ang 27 ka generator sets nga nagkantindad og P42 milyones alang sa ilang mga pump.

Ang bag-ong administrasyon sa MCWD board mohatag og gibug-aton sa mga gagmay nga supplier sa tubig ug dili lang sa mga higanteng magpapatigayon.

Si Charmaine Rodriguez-Kara, ang public information officer sa MCWD, nagkanayon nga sa sunod nilang mga transaksyon, si bisan kinsa nga water supplier makaapil sa ipahigayon nga public bidding basta ang ilang mga kompaniya makaabot sa mga rekisito nga gipangayo sa balaod.