Pagkuha og permit alang sa pagpahigayon og events sa Mandaue City gihigpitan
MAS gihigpitan karon ang pagkuha og permiso sa pagpahigayon og events sa dakbayan sa Mandaue.
Ang event organizers kinahanglan na nga mosumiter una og security, traffic, ug sanitation plan isip requirements sa pagkuha og permit sa city hall kon kini mopahigayon og kalihukan.
Matod ni Mayor Luigi Quisumbing nga iyang nabantayan nga sagad sa mga kalihukan ug aktibidad dakong hasol sa dakbayan tungod kay nagbubo og kahimanan niini ang kagamhanan gawas nga nakahasol sab kini sa publiko kon may mga sirhan nga dalan.
Ang mayor niingon nga makigkita siya sa mga nanag-iya og mga establisemento sama sa bar ug event organizers karong semanaha aron tukion ang mga regulasyon sa pagpahigayon og mga dagko nga kalihukan.
“First of all, thank you for your interest in holding your event in Mandaue City. But before you advertise, get your permits or coordinate with the City first,” matod ni Quisumbing sa iyang suwat ngadto sa business establishments.
Ang mayor nagkanayon nga bisan og iyang gidayeg ang pagpahigayon og mga dagkong kalihukan sa dakbayan, apan iyang gipaambit nga angay ikonsiderar ang mga gasto sa pagpakaon sa mga enforcer nga mobantay sa mga kalihukan sayo sa buntag hangtod sa gabii.
Dugang niya sagad sa mga kalihukan nga gi-schedule usab sa organizers mahitabo og weekend nga gikinahanglan nga pabantayan og enforcers.
Nabantayan usab nga human sa mga dagkong kalihukan, nagkatag ang mga basura sa venue o dalan.
“Though we understand this can be a good promotional tool for the City, the cost in meals for enforcers (many events start very early in the morning or end late at night), overtime for city personnel (events are often on the weekends) sanitation (garbage collection) can often be quite significant,” suma pa ni Quisumbing.
Matod niya nga ang maong mga kalihukan di niya panumbalingon kon kini gihimo alang sa charity.
“It would be one thing if these events were for charity, in which case we would wholeheartedly support but the vast majority of these are for profit,” sumala pa niya.
Padayag niini nga ang maayong organizer sama sa Ironman mohimo sab og Community Social Responsibility.
Aron kalikayan sab ang mga insidente samtang gihimo ang kalihukan, si Quisumbing niingon nga iya na nga gihangyo ang konseho sa dakbayan nga mopanday og ordinansa kalabot sa regulasyon sa mga kalihukan sama sa disco, concerts, duwa ug uban pang mga dagko nga kalihukan.