Manglungkabay nahadlok sa mannequin
NAILAD sa usa ka mannequin ang mga manglungkabay nga nanglungkab sa usa ka art shop didto sa Germany.
Nagtuo ang mga manglungkabay nga tinuod nga tawo ang mannequin nga nanglingkod sa sofa sud sa tindahan hinungdan nga nangahadlok sila ug dali nga nisibat apan nakabitbit sa 1,000 pounds nga kantidad sa mga tinda.
Si Derrick Thompson, tag-iya sa tindahan, nipaambit nga giluwas ni Shela Louise, manikin, ang iyang tindahan.
Iyang napalit si Shela gikan sa usa ka online shop German site sa miaging tuig.
Tuyo niya nga ipahiluna kini tapad sa iyang artwork aron makadani og dugang mga kustomer sa tindahan.
Si Derrick, 42, nagtuo nga dihang nakit-an sa mga manglungkabay si Shela sila nagtuo nga tinuod kini nga tawo.
Ang kapulisan nibutyag nga nakadawat sila og alarma sa pagpanglungkab alas 10:30 sa buntag niadtong Enero 8, Dominggo.
Pagka sunod buntag sa alas 9:45, Lunes, nakadawat na usab sila og ikaduhang report nga dunay laing gilungkab nga establisemento sa kasikbit nga lugar duol sa unang insidente diin ubayubay ka kagamitan ang nadala sa wa mailhing mga tawo.
Ang mga pulis nanawagan sa mga testigo nga mopatim-aw sa ilang buhatan aron pag-ila sa mga responsabli sa sunodsunod nga pagpanglungkab.
Si Derrick naghimo og Facebook account ni Shela aron pag- promote sa iyang art shop.
Sa taho sa Mirror News, ang mannequin duna nay sobra sa 1,500 ka mga higala ug 250 ka followers sa United Kingdom, America, Asya ug Middle East.