Kaso sa EJK?

UNSA man kining nahitabo ni Nino Roel Taboada, laing kaso sa extra judicial killing (EJK)? Mitumaw kining maong pangutana human ang mga kabanay ni Taboada miakusar sa mga sakop sa Philippine Drug Enforcement Agency (PDEA 7) nga ilang gipatay ang maong batan-on bisan kon walay armas de fuego og wala gyud mahilambigit sa kalihukan sa illegal nga drugas. Si Taboada, 28, aplikante sa pagka-pulis ug nagtrabaho sa isip usa ka call center agent ang napatay sa mga sakop sa PDEA niadtong miaging Huwebes sa gabii atol sa buy bust operation sa panimalay niini sa Duljo Fatima.

Kon ang version sa mga kabanay ang atong paminawon, sila mi-insister nga buotan ug tarung si Taboada. Bisan ang mga kauban niini sa Convergeys diin kini magtrabaho isip call center agent niingon nga dili badlungon ang maong batan-on. Matod pa sa inahan nga mao pa man gani kini ang mamadlong sa mga batan-on sa ilang lugar nga tiggamitan og illegal nga drugas nga mohunong na sa ilang bisyo.

Apan version usab sa PDEA nagkanayon nga kining maong batan-on mao ang usa sa mga subject o target sa ilang operasyon kay mao ang nag- operate og drug den o suyupanan sa maong lugar. Dugay na kini nilang gipanid-an. Unya atol sa pagpangronda, diha kini armas de fuego ug nihana og pusil sa mga ahente sa PDEA mao nga ila lang kining gi-unhan sa pagpusil ug dead on arrival sa hospital. Dihay armas nga narecover. Mi-insister si PDEA 7 Regional Director Yogi Felimon Ruiz nga lehitimo ang ilang operasyon. Dihay ubang mga tawo nga nadakpan atol sa ronda.

Kon tinuod ang pangangkon sa mga kabanay ni Taboada nga inosente kini, walay armas apan gipusil gihapon, aw, maka-ingon ta nga di kini maki-angayon. Abuso ug sobra na ang gihimo sa taga PDEA. Nganong ila mang patyon ang tawo kon pananglitan wala mosukol? Mao na ba kini ang estelo sa atong mga awtoridad? Dili kini maayo kay kini kalapasan sa tawhanong katungod sa biktima. Natural lang nga mangayo og hustisya ang iyang mga kabanay.

Apan sa pikas nga bahin, ato usab hatagan og ‘benefit of the doubt’ ang taga PDEA kabahin sa ilang version. Basin tinuod pod ang ilang gisulti nga armado ang maong tawo hinungdan nga ila nalang gi-unhan. Alangan man og magpatara ra sila. Daghan man pod kinabuhi sa mga law enforcers ang nadamay atol sa ilang operasyon kay nanukol ang mga target. Mas maayong maka-una kay sa maunhan. Pero aron pagresulbar ning tanan ug makapangayo og hustisya ang mga kabanay ni Taboada, mas maayo siguro nga moduol sila sa Commission on Human Rights (CHR 7) o ba kaha sa National Bureau of Investigation (NBI 7) aron ma-imbestigahan kini ug mogawas ang kamatuoran ug sa ingon makapangayo sila og hustisya sa gidangatan sa biktima.