Laing taktika

NISAAD si Mayor Tomas Osmeña nga iyang limpyuhan ang Brgy. Ermita gikan sa mga durugista pinaagi sa subsob nga mga operasyon kon hingpit nang masuspenso ang mga barangay official nga pinangulohan ni Barangay Captain Felicisimo Rupinta.

Nisulti si Osmeña nga ubos sa pamunoan ni Rupinta, nilipang ang negusyo sa illegal drugs ni anhing Rowen Secretaria, gitumbok nga usa sa mga dakong drug lord sa dakbayan sa Sugbo.

Maanindot ang saad sa mayor tungod kay ang Ermita usa sa mga barangay nga dunay dakong suliran sa drugas sud na sa daghang katuigan.

Apan di ba sa panahon ni Osmeña iyang gipalibutan og mga pulis ang Brgy. Pasil sa iyang pagsuway sa pagsumpo sa illegal drugs sa barangay katuigan na ang nakalabay, apan pakyas?

Di ba iya usab nga giparonda kanunay ang Brgy. Pulangbato, bukirang dapit sa Cebu City, nga gitawag og `little Pasil?’

Hangtod karon, kining duha ka mga barangay dagko gihapon og mga suliran sa illegal drugs, bisan sa pagtahan na sa daghang mga durugista.

Ang suliran sa drugas sa mao nga mga barangay nakagamot na og maayo. Maingon na gani nga maorag tipik na sa kinabuhi sa ubay-ubay nga mga lumolupyo ang illegal drugs.

Unsa kahay bag-ong taktika nga gamiton ni Osmeña sa iyang pagpuhag sa illegal drugs? Pinaagi gihapon sa mga pulis?

Namatud-an na nga ang mao nga paagi di epektibo tungod kay nagpabilin ang mao nga problema. Hangtod gani nga gipul-an na lang ang mga pulis.

Maayo unta kon ning higayuna, laing taktika ang buhaton sa mayor. Kanang epektibo nga kon di man gani hingpit makahanaw, makapiang og dako ug permanente na, sa illegal drugs.