Santo Niño ug politika

MOINSISTER kita karon nga lahi ra og walay labot si Senyor Santo Niño sa politika. Apan lain-laing mga kampo sa politika sa Sugbo mosangpit Kaniya alang sa panabang lakip na ang pagdaog sa mga bugno sa politika.

Hinuon, di tingale maglibog ang Ginuo kon kinsay dapigan kay nakahibawo gud siya kinsa ang mas angay kon papilion Siya kinsa ang angayan.

Ambot ba, wa man unta koy nakit-ang politiko dihang naminaw ako og kadiyot sa Misa sa ritwal nga Hubo, diin gihubo sa gisul-ob, gihugasan o gikaligo, dayon giilisan ang imahen sa Batang Hesus nga si Senyor Santo Niño.

Hinuon, dili ang Misa maoy akong tuyo sa pag-adto sa Pilgrim Center sa Basilica Minore del Santo Niño sa miaging Biyernes. Nangita ko asa gipahigayon ang “Book Talk and Signing” sa librong “The Feast of Senyor Santo Niño” nga sinulat ni Resil Mojares.

Gani, nagbitbit ko og 15 ka kopya sa maong libro aron akong papirmahan. Sa pagka tinuod, nag- order ko og daghan gikan sa USC Press apan 15 lang ang akong gidala kay mao usab ang hangyo sa akong anak nga si Karlo. Nagplano man kining magdala og mga kopya sa kaulohan alang sab sa iyang mga kaila.

Tingale, nisulod sa akong hunahuna kining kabahin sa politika kay naa man gyuy usa ka chapter ang maong libro kabahin politika tali sa mga prayle ug ang lokal nga kagamhanan niadtong tungora.

Apan, samtang naminaw ko kang Dr. Mojares, atong nasabtan nga dakong bahin ang politika sa pag-abot sa imahen sa Senyor dinhi sa Sugbo.

Tinuod, pagpakatap sa Kristiyanismo ug Simbahang Katoliko ang usa sa mga tuyo nilang Ferdinand Magellan sa pag-anhi sa Sugbo. Ug ang imahen ni Senyor Santo Niño maoy ilang gidalang simbolo niini.

Gani, gigasa ni Magellan ang imahen kang Juana, ang rayna sa Sugbo niadtong higayonan dihang gibunyagan kini. Usa kini ka relihiyoso nga kalambuan.

Apan, tuyo sab ni Magellan mao ang pagbutang sa Sugbo ubos sa pagdumala sa Hari sa Espanya. Kini dakong politikanhong kalambuan.

ATONG GIANGKON

Apan alang kanako, mas mahinungdanon ang nahitabo human napildi ug namatay si Magellan sa mga kamot ni LapuLapu.

Gamay lang ang kahibawo nga gimasaker sa mga tawo ni Rajah Humabon ang mga 30 ka sakop sa mga nahabiling mga tawo ni Magellan samtang gibaligya isip ulipon ang pipila. Ila sab nga gisunog ang dakong krus nga giugbok ni Magellan sa misa dihang gibunyagan ang mga Sugboanon.

Lisud na, alang kang Humabon, nga posibleng tua na moyukbo kang Lapu-Lapu ang mga Sugboanon kay mao man kini ang nisukol ug wala magpabunyag.

Dili kini relihiyoso nga kalihokan sa mga Sugboanon ang kadaugan ni LapuLapu ug ang pagbakwi ni Humabon sa iyang pagyukbo ngadto kang Magellan ug sa Espanya. Usa kini ka politikanhong pagpatigbabaw nga ang mga Sugboanon maoy hari sa Sugbo.

Apan wala gisalikway ni Rajah Juana ug sa mga Sugboanon ang imahen ni Senyor Santo Niño. Gisuka ug giluwa nato ang mga sundawo sa Espanya, apan atong gidawat ug gihimong lakip sa atuang giampoan isip Ginuo ang imahen sa Senyor.

SUGBOANON NA

Gituohan nga bisan pa og nalakip sa atong tradisyonal nga pagtuo ang Senyor, nahimo kining espesyal. Mao kini ang obserbasyon sa laing

Spanish expedition nga niabot sa Sugbo pinangulohan ni Miguel Lopez de Legaspi.

Apan alang nilang Legaspi, ang ilang pag diskubre sa Senyor nga lakip sa mga giampoan sa mga Sugboanon, daw simbolo kini nga sakto ang ilang gibuhat nga pagpasakop pagbalik sa Sugbo ug mga kasilinganang isla ubos sa gingharian sa Espanya kaniadtong 1521.

Bisan pa man, naturok na sa mga Sugboanon ang espesyal nga debosyon alang kang Senyor Santo Niño ug human sa pipila ka siglo, nahimo nang tipik ang Senyor sa identity nato nga mga Sugboanon.

Gamay lang ang kahibawo nga gimasaker sa mga tawo ni Rajah Humabon ang mga 30 ka sakop sa mga nahabiling mga tawo ni Magellan samtang gibaligya isip ulipon ang pipila. Ila sab nga gisunog ang dakong krus nga giugbok ni Magellan sa misa dihang gibunyagan ang mga Sugboanon