Ayaw pagdali

NIADTONG Disyembre, samtang nagtapok ming suod nga mga pamilya, nihunghong ang akong usa ka higala nga magassemble siya og biseklita. Magpatabang siya nako. Ako siyang gitangdo, apan akong giingnan nga mangunsulta ko sa akong higala nga bike technician ug hobbiest.

Pipila ka adlaw sa among kukabildo, nag- message siya nako sa Facebook aron magsugod na siyag palit ug magtigom. Ako siyang giingnan nga ang present trend sa mga tag-as pareho niya, ang 29er. Sa sama nako, ang 27.5 nga frame ang bagay kay mubo man.

Base usab sa sulti sa akong higala, mixed sa brandnew ug slightly used ang gamiton. Naa sa mga P60,000 ang budget nga kuhaon sud sa upat ka buwan. Nisagunto siya kay mahal ra kuno. Ako siyang giingnan nga wa ko maghisgot og bike parts nga ubos ang klase, kon di ari nas taas nga klase sa Shimano series, gikan sa SLX ngadto sa XT. Ako siyang giingnan nga di magpanareho nako nga nasayop sa akong gibuhat kaniadto. Mas dako na hinuon ang gasto. Anha modako ang gasto kon maengganyo o magalgal na ka og upgrade sa imong bike parts, apil na ang frame.

Sayop Sa akong bonus niadtong 2009 ug plano nga mag bike kada duaw sa lubong sa akong anak, nipalit ko og biseklita nga tag P8,000. Disc brake na, apan dunay problema sa shifting. Bisan giunsa, wa na maayo sa mga bike technician.

Naka- decide ko nga moupgrade. Pilay akong nagasto sa parts nga Shimano Alivio lang? Niabot og P10,000 kay nangilis ko hapit tanan nga part sa akong biseklita. Frame na lang ang nahabilin. Paglabay sa pipila ka buwan, niupgrade na sab ko ngadto sa Deore. Nag-ilis sab ko og frame hangtod nakapabarog ko og upat ka mountain bikes kay wa nako gipamaligya ang akong giilisan.

Akong giingnan ang akong higala nga sa among pabarugon nga biseklita nga 11- speed na, di na siya magsigeg upgrade, gikan sa drive train ngadto sa wheelset ug frame. Bagay sab sa iyang status kay usa siya ka bank manager. Mas mahal ang built bike kay sa assembled.

Nakaamgo Kining akong experience daghan ang nahitaboan ani. Nganong nakahibawo ko? Mao ni pirme nako makit-an sa mag-estambayan pa ko kaniadto sa Aison Bikeshop sa dan A.S. Fortuna sa Mandaue City. Way adlaw nga way mag- upgrade, labina niadtong mga adunahan. Kaming mga ordinaryo ra, usahay matintal og palit kay hapit na tinunga ang presyo.

Nakaamgo ko nga di diay maayo nga mag-ahat ahat og palit og parts kay hubuon ra sab ni kay mag- upgrade aron di mabiyaan sa mga higala. Unya, kanang upgrade usa sab na sa makapagana nimo sa pagkuyog sa imong mga higala kay imong ipakita nga naa kay bag o nga dapat sa bike.

Planohag maayo kon mag bike na ka. Tun-i una sa di ka pa mopalit kay mahal ang masayop.