Everytime you go away
NAKADUKO si JP sa pagtando ko niya. Morag duna siyay lawom nga gihunahuna. Wa ko magbasol sa pagtug-an niya nga si Gino ang akong love. Mas maayo nga makahibawo siya sa tinuod. Siyaro kon mopadayon gihapon siya sa pagpangulitawo nako.
“Secret love ko si Gino, uy, JP. Naghuwat ko nga iyang pangulitawhan. Na, kon mopadayag lang siya sa iyang paghigugma nako, sugton ko dayon siya.”
Gipahiyoman ko si JP dihang mitan-aw siya nako. Nagpabilin siyang seryuso.
“You know, Mercy, kon love ka pa ni Gino gipangulitawhan ka na unta niya. Kanunay gud mong mag-uban.” “Naghuwat lang tingali siyag hustong higayon, JP.” “Imposible nang mahitabo,uy, Mers.” Nakunot ang akong agtang nga mitutok kang JP. “Ngano gung nakaingon ka man ana, JP? Duna nay uyab si Gino?”
“Well, sa akong nahibaw-an, wa man siyay uyab. Pero hunahunaa lang gud. Sa kanunay ninyong pagkuyog sa pagpangaon, sa inyong pagtuon, ug uban pa ninyong panag-uban, mopasumbingay unta siya nga nakagusto siya nimo? Pero wa man kaha?”
Nahilom ko. Morag may rason si JP. Kon nakagusto si Gino nako, mamatikdan ko unta sa iyang mga lihok ug tinan-awan nako. Mopasumbingay gyud unta siya nako nga love ko niya. Pero wa man. Basig husto si JP nga wa gyuy gusto si Gino nako?
“Basta sa akong pagtuo, JP, nakagusto gyud sa hilom si Gino nako. Maghuwat lang gyud ko nga iyang pangulitawhan.” Gipamugos ko kang JP ang akong pagtuo. Lawom kaayog panghupaw si JP. Nahikatawa ko. “Basted ka na nako, JP. Sori na lang gyud nga di ikaw ang akong love.” Miseryuso ko.
Sa nawong ni JP, nakita ko ang gibati niyang frustration. Morag tinud-anay ang gibati niya nako. Wa na siya magkinumedya sa iyang sinultihan nako.
“Bisan pa anang imong giingon ron nako, Mercy, wa mausab ang dako kong pagmahal nimo. Mopadayon lang gihapon ko sa pagpabatyag nimo sa akong gugma.”
Sa tan-aw ko kang JP, wa siya magkumedya sa iyang gisulti. Aw, bahala siya. Hilom kong nakaingon. “Ikaw gud. Basta nakahibawo ka na nga si Gino ang akong love.” Mipauli si JP nga magul-anon. Ug samtang naghigda ko sa sulod sa akong kuwarto, nahunahuna ko nga nasayop diay ko sa akong pagtuo nga binuang lang ang pagpadayag ni JP sa iyang gugma nako. Nasuta ko ganina sa among pag-atubang nga true love gyud ang iyang gibati nako.
Sorry na lang gyud niya. Gino is my man.
(SUMPAYAN)