Aron di ka magmahay sa dinaliang pagminyo
DAGHAN nga mga nagminyo og sayo nga nagkalisud-lisod tungod kay wala makahuman sa pagtungha ug maglisod pagpangita og maayong trabaho aron isuporta sa ilang pamilya.
Aduna usa’y posibilidad nga dili makapatungha sa mga anak tungod sa kalisod. Kon dato man ang mga ginikanan, di maayo usab nga magsalig tungod kay adunay posibilidad nga mawala ang kadato kon magsige lang og salig ug di usab maningkamot. Angay nga hinumdoman nga ang ginikanan dili kanunay nga batan-on moabot usab ang panahon nga sila matigulang ug sila nasab ang angayan nga atimanon.
Aron malikayan ug mabantayan sa kabataan karon ang mga posibling mahitabo kon magdali-dali og desisyon nga magminyo, dunay posibilidad nga mahayan. Aron di kini mahitabo, likayi kini:
Ayaw pagdali og minyo
Ang pasulod sa kaminyuon dili sayon tungod kay mao na kini ang panahon nga mamahimong magtukod sa kaugalingon nga pamilya ug makauban na ang hinigugma sa kinabuhi apan di kini bastabasta nga sudlan tungod kay grabe usab ka daghan nga mga pagsulay nga mahimo unyang masinati panahon sa kaminyuon. Kasagaran sa mga tawo, dili mangandoy nga mag-inusara sa kinabuhi mao nga mangita og asawa o bana. Ang sayop man gud sa kasagaran kay grabe nga magassume kon adunay bag-o nga gwapo ug gwapa nga makaila mosugot dayon, magdali-dali dayon sa pagminyo bisan bag-o pa gani nga nagka-uyab hangtud nga inig abot sa panahon madiskobrihan nalang nga dili diay sila para sa usa’g usa.
Ayaw pagdali-dali sa desisyon
Usa sa mga butang nga kasagaran buhaton kon naa pa sa 20s mao ang magdalidali sa mga desisyon. Mag- assume dayon nga sakto na sila sa ilang gibuhat ug ang uban dili na motuo sa tambag sa mga ginikanan. Ang uban dili gani timbang-timbangon kon unsa’y posibilidad nga mahitabo sa kaulahian sa ilang desisyon, sa laktod nga pagka sulti wala na maghunahuna sa kaugmaon tungod kay karon lang ang gihunahuna.
Nagdalidali pagpanganak
Usahay ang pagminyo og sayo dili makaayo, apan sa lain bahin maayo usab kini tungod kay magsugod na sa bag-ong kinabuhi kauban sa hinigugma. Apan kon magminyo og sayo masinati na ang mga kalisdanan tungod kay magka anak naman ug dili mahimong pasagdan. Ang pagdalidali nga magkaanak usa sa mga sayop nga mahimong pagamahayan inig abot sa 30s.
Ayaw palay-i ang pamilya
Ang pamilya mao ang labingsuod nato nga tawo sa atong kinabuhi nga dili mailisan sama sa bana o asawa, tungod kay sila ang nagmatuto nato ug nagtudlo kon unsa’y angay’ng buhaton. Sa 20’s nga pangidaron usahay ang uban dili na mogahin og oras sa mga ginikanan tungod kay busy sa eskwelahan, ilabi na kon aduna na sila’y hinigugma dili na magtagad sa ginikanan samot pa kon magtuman sa gusto. Ang uban ila pa nga isipon nga babag ang ilang ginikanan sa ilang kalipay ug dili nalang paminawon. Usahay moresulta dayon kini sa pagkaminyo og sayo ug ang uban mag taban pa.
Ayaw pagtuong nakahibawo ka na
Ang uban nga teenagers di na maminaw sa tambag sa ilang mga ginikanan tungod kay magtuo na sila nga sakto na sila sa ilang mga desisyon ug gibuhat. Niño B. Baldevino USJ-R B.A. Communication Intern/ http:// www.thetalko.com